Manchester City laka Premier League dan bawhchhiatna chungchanga hremna nghah mek a nih lai hian, kum 2009 leh 2018 inkar chhunga Premier League title an lo lak tawh chungchangah football ṭantute leh player hlui te ngaihdan a inkhawlhrual nasa hle. Manchester United goalkeeper hlui David de Gea chuan kum 2012 leh 2018 title chu United hnena hlan a nih a duh thu a lo sawi tawh a, defender hlui Rio Ferdinand pawhin United chu league title 22 la tawh tura ngaih an nih thu a lo sawi tawh bawk a ni.
Hetih rual hian United hnenah hian nomawi hi an hlan kher angem tih chu hriat a la ni lova, City hian dan thianghlim lo hmanga an lak nia ngaih a nih avangin heng season chhunga title-te hi thiah (null and void) a nih mai a rinawm zawk hle. United striker hlui Wayne Rooney pawhin City chu a theih tawpa hrem ni se a duh rualin, title hi dawhkan hnuai aṭanga pek an nih chuan an champion tak tak anga a inhriat dawn loh avangin nomawi dawn kher chu a duh loh thu a sawi chhuak ve thung. Tunah hian midfielder hlui Nemanja Matic pawh he thilah hian rawn ṭawngchhuak vein a ngaihdan a rawn phawrh ve leh ta a ni.
Jose Mourinho-a enkawl lai kum 2017 khan Matic hian United hi a zawm a. Club legend tia chhal tur ni lo mah se, khelmualah theihna sang tak pholangin player ṭangkai tak a ni chho a ni. A bikin 2017-18 season chhung khan Matic hi a che ṭha em em a, khami season khan United chu City dawtah pahnihna an ni a nih kha. Matic hian a thachhawnkhawp thawk ve tho nia inhriain, fiamthu titak deuhvin champion medal leh a kaihhnawih sum a beisei thu a rawn tarlang a ni.
A X (Twitter hlui) account lamah fan pakhatin Matic-a goal khung kha title lak nana pawimawh tak a nih theih zia a sawina chu chhangletin, kum 37 mi Matic hian, "Ka title bonus hi ka duh a nia 😀" tiin nui hmel emoji nen a post a ni.
Khami season March thlaa Crystal Palace an hmachhawn ṭum khan, run-in boruak a san chhoh tan laiin Matic hian yard hla tak aṭangin half-volley hmangin top corner-ah mawi lutuk maiin goal a lo chhuih lut tawh a nih kha. Point 100 ngawt hmu a champion Man City kha dan bawhchhia an lo ni reng a nih ngat chuan, Matic-a goal khung kha United-in title an lak theih nana pen pawimawh tak a lo tling reng dawn a ni.
Khami season kha thlir let chuan, khatih lai khan Jose Mourinho leh a naute chet ṭhat dan kha kan lo hlut tawk lo hle niin a lang. Kum thum liam ta boruak nena khaikhin phei chuan kha hun kha a ropui hle a; khelmual thianghlimah chuan United kha Premier League champion ni mai thei an ni a, FA Cup final-ah Chelsea lakah tlawm lo phei se chuan domestic double hial la thei dinhmunah an ding a ni.
United hnenah hian title hi hlan let a nih ngei chu a rinawm chiah loh rualin, ni a liam zel a, City hian hremna nasa tak an tawk dawn tih chu a chiang chho tial tial a, chumi thleng tur chu football khawvel nghahfak a ni chho mek a ni.
