International break zawh hnua Premier League khelh chhunzawm a nih leh dawn takah chuan, Manchester United player pawimawh ṭhenkhat chu khelmual chhungah an kir leh tawh dawn a. Inrinni hian Michael Carrick-a naute chuan Old Trafford-ah Tottenham an mikhual dawn a ni.
Tun season bul an ṭan danah United hi an che fuh tawk lo hle a, league match-ah vawikhat chiah hnehna an la chang a, derby match-ah an tlawm bakah Carabao Cup aṭangin an tla fel tawh bawk a ni. Season liam ta tawp lamah Carrick-a hnuaiah hmalam pan viau mah se, kumin season ṭan thla hmasa ber chu United fan-te tan chuan beidawnthlak tak a tling a ni.
Khelmual pawn lamah pawh buaina an nei chho zui a, an academy chhuak theihna ngah tak JJ Gabriel chuan club chhuahsan a duh thu a sawi chhuak bawk. Manager Carrick-a lakah pressure a san chhoh mek laiin, Champions League-a Atletico Madrid an luhchhuah hmain Tottenham lakah hian point thum hmuh ngei an mamawh takzet a ni.
Hemi rual hian transfer bazar lamah United chu Croatian striker langsar chho mek Igor Matanovic ngaihventute zingah an tel ve tih tarlan a ni. CaughtOffside tarlan danin, United chuan Freiburg striker hi an thlithlai reng a, kum 2027 January transfer-ah emaw, nipui bazarah emaw dawrna thehluh an rilruk mek a ni.
Kum 23 mi, feet 6 leh inches 5-a sang Matanovic hian German club Freiburg chu season liam ta Europa League final a thlenpui a, final-ah hian Aston Villa lakah an tlawm a nih kha. Arsenal leh Chelsea pawhin he striker dinhmun hi an ngaichang reng a, England rama khelh a chak tawh hle nia hriat a nih avangin Premier League a pan thuai beisei a ni.
Freiburg pawhin he striker hlutna pung chho mek hi hriain, a man atana an chhiar zat chu £30m aṭangin £50m-ah an tisang tawh a ni. Matanovic hian Croatia tan match 14 a khelhah goal 2 a khung tawh a, Nations League-a mahni muala England laka 7-0 ngawta an tlawm ṭum pawh khan half-time-ah a rawn inlan bawk a ni.
Thudangah chuan, United captain Bruno Fernandes chuan Portugal squad aṭanga thawk leh khata chhuak ta Cristiano Ronaldo nena an inbiak dan a sawichhuak. Kum 41 mi Ronaldo hian Norway khualmuala 2-1 a an hneh ṭuma bench-a dah a nih avangin head coach Jorge Jesus nen an intihthiam loh hnuah national team camp hi a chhuahsan a ni.
Ronaldo chuan Instagram-ah thuchhuah siamin a chhuah chhan dik tak chu nakin lawkah mipuite hnenah a la tarlan tur thu a sawi a, international football a chawlhsan mai dawn em tih erawh nemngheh a la ni lo.
Pathiannia Porto khawpuia mualneitu ni chunga Norway an hmachhawn hmain, Fernandes chuan Ronaldo hi a biak ngei thu nemnghetin heti hian a sawi: "Cris-a nen hian kan inbia a ni. Thil thleng engpawh nise, Portugal ram leh khawvel pum tana a thil lo tih tawh zawng zawng avang hian kan ram tana chhinchhiahna ropui ber a nihna hi a hloh ngai dawn lo tih ka hrilh a. Hun zawng zawnga player ropui berte zinga mi a nih bakah, Portuguese mipuite thinlungah hmun bik a nei reng tawh dawn a ni," a ti.
Inpumkhat a pawimawh thu sawi zuiin Fernandes chuan, "Kan inṭhenhrang tur a ni lo; national team chu pakhat chauh a ni a, he buaina hi a ruka chinfel a nih ka beisei. Thil a kal tluang leh vek mai ang. Keini squad chu he buaina pawnah hian kan awm a, card kan deng nasa a, thil thleng vel hian min tibuai lo. Mahse kan ram hi inṭhenhrang lo se, thlan bik nei lovin thil zawng zawng pawm thiam se ka duh a ni. Cris hi kan national team leh khawvel football-a mi ropui ber a ni reng ang a, tupawhin duh zual emaw duh lo emaw, Portuguese mipuite zahna dawng tlak a ni reng ang," tiin a sawi zui bawk.
