Manchester United full-back Patrick Dorgu chuan Denmark leh Wales ten Nations League match an khelh laiah minute 30 pawh a khelh tlin hmain hliam avangin khelmual a chhuahsan a ngai a, hei hi United tan chuan chanchin ṭha lo tak a tling a ni.
Kum 21 mi Dorgu hi Denmark lamin an nawr laiin a veilam malpui hnunglam dawmin a tlu a, Wales lamin counter-attack an neih chhunzawm lai pawhin khelmualah a ṭhu zui reng a ni. Denmark lamin ball an chan leh hnuah Joakim Maehle chuan a ṭhianpa hliam a buaipui theih nan ball chu khelmual pawnah a pet chhuak ta a ni.
Denmark national team medical staff pahnihin khelmual chhungah Dorgu hi an buaipui nghal a, a khelh zawm thei dawn lo tih an hriat hnuah lakchhuah a ni. Minute 30-na velah Mohammed Daramy chu Dorgu-a thlak tur hian a rawn lut a, medical staff pakhat chuan he United defender hi a hruai chhuak zui a ni.
BBC commentator Simon Davies chuan he match-ah hian Dorgu chu Denmark hmalakna zawng zawng deuhthawah a inrawlh ber a nih thu a sawi a. A sawipui tu Nia Jones pawhin, "Patrick Dorgu hi an fimkhurpui hle dawn a, engmah hlauhawm hmachhawn tir an tum lo a ni," tiin a sawi bawk.
He tlangval hi a hma minute tlemteah Maehle-a sir aṭanga overlapping run a neih lai aṭang tawh khan a tha a lo pawt (pull up) ṭan tawh nia hriat a ni. Ball rawn dawngin a pek chhuah leh hnuah bai auh auh chungin a inlar zui a. Minute khat hnu vela a ke veilama through ball a pet chhuah hnuah mualah mu zuiin, buaipui a nih hma chuan a tho chhuak thei ta lo a ni.
Denmark head coach Brian Riemer chuan Ningani liam taa an Nations League match hmasa zawkah pawh khan Dorgu hi a lo la chhuak tawh a. Erling Haaland-a'n Norway tana hma a hruaipui hnu khan minute 75-naah double change hmangin lakchhuah a lo ni tawh bawk a ni.
Dorgu hi United tana an match hnuhnung pahnihah a inlan tlem hle a. Brighton & Hove Albion nena Carabao Cup third round an khelh ṭum khan chawlh hahdam tir a ni a. Hemi hnu hian Luke Shaw a rawn dam leh tak avangin Fulham an lenchilh ṭum khan bench aṭangin a rawn lut a, hun tawp dawnah Matheus Cunha-a siphurh sutna goal tur assist a nei a nih kha.
Denmark hian international break chhung hian match hnih an la hmabak a. Ningani hian mahni mualah Portugal an mikhual dawn a, chumi hnu kar lehah Cardiff-ah Wales an lenchilh leh dawn a ni. Dorgu hi squad-ah a cham chhunzawm thei ang em tih erawh hriat a la ni lo.
United tan hian ram tana fehchhuahna (international break) hian buaina a thlen nual a. Denmark-in an hmachhawn tur Portugal captain Bruno Fernandes pawh Ningani khan Wales laka an khelh ṭumin a bai chhuak a. Marcus Rashford leh Kobbie Mainoo te pawh England squad aṭangin an inhnukdawk tawh a, Benjamin Sesko leh Karl Darlow te pawh Slovenia leh Wales squad aṭangin an lo inhnukdawk tawh bawk a ni.
