Manchester United chuan Barcelona left-back Alejandro Balde chu Camp Nou-a manager thar Hansi Flick-a hnuaiah thlan pathumna (third-choice) a nih tak avangin, January transfer window-ah lakluh nawn leh dan kawng an ngaihtuah mek nia tarlan a ni.
Spanish chanchinbu Mundo Deportivo tarlan danin, Red Devils hian kum 22 mi international player hi an ngaihven zui zel (firm interest) a ni. Heti a nih rual hian, tun dinhmunah club pahnih inkarah inremna a la awm lova, official dawrna (submitted bid) thehluh pawh a la awm rih lo a ni.
Kumin tun season inṭan hma khan INEOS chuan Luke Shaw chauh pawh left-back position-ah a tawk thawkhat tura an ngaih avangin player thar an la lut lo a, mahse he thutlukna hian rah ṭha a chhuah lo hle. Shaw hian hliam vangin match thum ngawt a chawl tawh a, a thlaktu tura ngaih Patrick Dorgu-a'n beisei a phak tawk loh bakah, rawlthar Harry Amass lah first-team football khel tam turin an la inpeih tawk lo nia ngaih a ni. Chuvang chuan Noussair Mazraoui leh Diogo Dalot te chu right-back leh left-back-ah an inthleng kual reng a ngai dawn nia lang a ni.
United hian a tirah Newcastle United defender Lewis Hall pawh an lo thlithlai tawh a, mahse Magpies lamin dawrna tak tak a thlen hmain kawngka an kharsak tak avangin, Old Trafford club hian nakkum nipui thleng nghah phawt an rilruk leh ta zawk a ni. Nipui transfer window khar hnaih khan United hian Balde hi loan-a lakluh an lo dil tawh a, mahse Barcelona lamin an lo hnawlsak a ni. Khatih lai khan Barcelona manager hlui Xavi-a'n "revelation" (phawrhchhuah ropui) ti hiala a lo fak ṭhin Balde pawh hian Camp Nou-ah a hmun chuh tura cham zui a lo thlang tawh bawk.
Mahse tun season-ah Flick-a hnuaiah Balde hian minute 12 chiah mualah hun a la hmang a, João Cancelo leh rawlthar Xavi Espart te hnuai zawhah a awm mek a ni. German coach Flick hian season liam taa Balde-a form tlakhniam aṭang khan a theihna a ṭhang zui zel lo (stagnation) nia a hriat avangin hetiang dinhmunah hian a dahtil nia sawi a ni.
Mundo Deportivo report chuan, "January transfer window hi Balde-a tana a hmabak ngaihtuah tharna hun pawimawh tak a ni thei a, Flick-a hnuaiah minute khelh tamna hun a hmu chhunzawm lo a nih chuan a rilru a thlak ve thei a ni. United pawhin a dinhmun hi ngawrh takin an thlithlai reng a ni," tiin a tarlang.
Balde-a'n kumin kum tawp hmaa mual chhunga hun a hman zat hi he transfer a puitlin leh puitlin loh tur hriltu ber a ni dawn a. Flick-a'n minutes a pe tlem chhunzawm zel a nih chuan, Camp Nou leh Carrington lama hotute ngaihdan pawh a inthlak danglam thut thei a, mahse tun dinhmunah chuan ngaihvenna satliah chauh a la ni rih a ni.
