Manchester United captain hlui Gary Neville chuan kum 2013-a Sir Alex Ferguson-a'n chawlh a lak hnu chhunga United player lak thluh ber (worst signing) atan £82m man Brazilian winger Antony chu a thlang ta a ni.

The Athletic FC bawk Metro-in a tarlan danin, United captain hlui hian kum 13 liam ta chhunga Old Trafford club-in player an lak luh hrang hrangte ngun takin a chhut a. A tawpah he Brazilian winger hi Argentina international Angel Di Maria ai pawha an player lak thluh ber nia a hriat thu a sawi chhuak a ni.

Sir Alex Ferguson-a'n kum 2013-a Manchester United hotu nihna a chawlhsan hnu hian, Red Devils hian player thar lak luh nan sum tam tak an seng tawh a, mahse an player lak luh tam zawk hian beisei an phak lo hle ṭhin. Heng player sang tak tak mana an lak luh zingah hian Neville hian South America player pahnih, Antony leh Angel Di Maria te chu an player lak thluh ber zinga mi an nih thu a sawi lang.

£82m zeta an lak luh Antony hi Ajax aṭanga Old Trafford rawn pan a ni a, a man a to em avang leh khelmuala a chet ṭhat tawk loh avangin sawisel a hlawh nasa hle a ni. Chutiang bawkin Real Madrid aṭanga lak luh Angel Di Maria pawh a tirah beiseina sang tak nen pan pui ni mah se, Manchester-ah hian hun hlimawm tak a hmang thei lo a, thla tlem te hnuah club hi a chhuahsan zui leh ta a ni.

Neville-a assessment-ah hian, Sir Alex Ferguson-a chhuah hnuah club-in transfer bazar-a thutlukna an siam ṭhin tam tak chu structured ṭha tawk lo leh player-te theihna hmang ṭha thei lo zawk an nih thu tarlan a ni a. Kum 13 chhung zet football recruitment lama Old Trafford club chet dan leh hmasawnna awm lo lutuk chu Neville hian United hmakhua atana pawi a tih thu a phawrh chhuak a ni.

United tan hian Antony-a lak luhna atan hian sum tam tak seng ni mah se, khelmuala a thawhhlawk tawk lohna hi mipuite leh pundit-te tana thupui lian tak a ni chho ta reng a. Gary Neville-a'n player thluh ber atana a thlannain a tarlan chiang tak chu, United hian transfer bazar-ah tawnhriat leh hlawhtlinna nei zawk tura inremna an siam ṭhin tawk loh zia a tilang chiang hle a ni.