Manchester United chuan attack lam an thuam chhah hnuin, kumin transfer window-ah khan an midfield thuam chhah hi an tum ber a ni a. INEOS pawhin Premier League-a fiah tawh midfielder ṭha tak tak pathum chu Old Trafford-ah an lalut fel ta reng a ni.

Amaherawhchu, tlarhnung (defense) lam erawh an hlamchhiah rih thung a, nakum nipui (2027) lama hmang ṭha tura inruahmanna an siam avangin tlarhnung thuam chakna tur player thar an lalut lo a ni. Tun season-ah United hian Premier League match khelh tawhah clean sheet (goal chhuah lova inkhelh khar) vawikhat mah an la nei lo a, hei hian an thutlukna leh ruahmanna kha a dik tawk lo hle tih a tilang chho mek a ni.

Executive chairman Omar Berrada leh director of football Jason Wilcox te chuan an ruahmanna siamsa pênsan an duh loh avangin sawiselna nasa tak an tawk a. Chutih rualin, club sporting department lam erawh chuan rukin player thar lak luhna tur inbiakna leh ruahmanna an la kalpui char char thung.

Theatre of Red thuthang phawrhchhuaktu Shaun Connolly-a'n a tarlan danin, Manchester United chuan tlarhnungah player thar pathum ngawt lak luh an tum a; full-back sir tawn ve veah mi pahnih leh, rawlthar theihna ngah Leny Yoro-a leh Ayden Heaven-a te tlarhnung lailia puitu tur centre-back pakhat lak luh an rilruk a ni.

Left-back atan Newcastle United-ah contract thar sei tak ziafel tawh mah se, kum 22 mi Lewis Hall-a hi INEOS chuan lak luh an la duh char char a, club chhungril thudawnna pawhin he transfer hi tihpuitlin theih ngei an inbeisei thu an sawi. Hall-a aiawhtu tur (alternative) atan Crystal Palace left-back Tyrick Mitchell-a pawh an ngaihven bawk a, a contract hi tun season tawpah a zawh dawn avangin lak luh awlsam zawka ngaih a ni.

Mual dinglam right-back atan United hian ram chhung leh Europe khawmualpui aṭangin player hming engemaw zat an chhinchhiah tawh a. Heng zingah AS Roma-a khel mek Brazilian star Wesley-a chuan Carrington-a club hotute, a bikin Michael Sansoni-a department mit a la hle a ni.

Kum 23 mi Wesley-a hi wing-back attack duh chi tak niin, United full-back ropui leh hmingthangte mizia leh khelh dan ang chiah phawrhchhuak thei player a ni. Season liam ta khan Serie A-ah match 30 inlanin goal 5 ngawt a khung a, tun season-ah pawh assist vawi khat a nei tling tawh a ni.

Tlarhnung laili (centre-back) atan Wilcox-a leh a naute hian khelmual puitling sa, rawn infit nghal thlap thei tur an duh a, Everton defender Jarrad Branthwaite-a leh Nottingham Forest defender Murillo-a te pawh ngawrh takin an chhui zui mek a ni.