Manchester United-in left-back ṭha tak lakluh an tumna kawngah Crystal Palace player Tyrick Mitchell-a hming a langsar hle a, mahse he player hmakhua humhim tur hian Palace lam pawhin contract thar ziahpui tura inbiakna an kalpui chak hle tih hriat a ni.
Old Trafford-ah tlarhnung veilam (left-back) thuam chak hi 2027 leh a hnu lam atan ngaihpawimawh hmasak ber tur zinga mi a ni dawn a. Manchester United leh an club neitu INEOS te hian nipui liam ta khan he position hi thuamchak an lo tum tawh a, mahse midfield lam siksawi hna an thawh nasat em avangin left-back lian tham lak luhna hna hi an lo ṭhulh rih a ni.
Nakkum lamah he ruahmanna hi chhunzawm leh tur atana ngaih a nih laiin, Red Devils te hian an lak luh duh ber Newcastle United player Lewis Hall erawh an la lut thei dawn ta lo thung. Hall hian St James' Park-ah contract thar a ziak fel tawh a, Newcastle United-ah hun rei tak cham chhunzawm a duh thu leh club tana rinawm a nih thu a puang fel tawh a ni.
Hetianga an target ber an chan takah hian United chuan Crystal Palace left-back Tyrick Mitchell lamah an mit an len ta a. Mitchell-a theihna leh Premier League-a a tawnhriat neih ṭhat bakah, Selhurst Park-a a contract neih mek nakkum nipuia a zawh tawh dawn avangin INEOS hian man tlawm zawka lakluh nan he English player hi an it hle nia ngaih a ni.
English champion vawi 20 ni tawh Manchester United-in awlsam zawka Mitchell lakluh an tum mek lai hian, Palace lam aṭangin chanchin thar a rawn awm ve ta thung. Football Insider tarlan danin Crystal Palace chuan Mitchell-a hmakhua Selhurst Park-ah tihnghettir thuai tumin contract thar ziahpui an ruahman chak hle a ni.
Palace chairman Steve Parish chuan khelmualah an club-in player "pakhat emaw pahnih" vel contract thar ziahpui an duh thu a lo sawichhuak tawh a, thudawnnate tarlan danin heng player-te zingah hian Mitchell hi a hmasaber (first in line) a ni. United-in an player an ngaihven nasat em avangin Eagles hotute hi an phili deuh nia tarlan a ni bawk.
Mitchell-a'n United zawm a duh tak hlauhva contract thar ziah pui tumna he inbiakna hi a hnawl a nih pawhin, Red Devils tan hian he transfer hi a awlsam ngawt dawn lo. A chhan chu Crystal Palace hian Mitchell-a contract neih lai hi kum khat danga pawhsei theihna (one-year extension option) an la kawl tlat avang a ni.
