Manchester United player-te chu Thawhlehni hian Carrington training ground-ah kir lehin training tan zawm turin an inbuatsaih mek a, mahse an head coach Michael Carrick-a'n mawhphurhna a chelh zui zel dawn em tih erawh a la chiang lo a ni.

Pathianni liam ta khan Old Trafford-ah Manchester United chu Bournemouth laka 3-0 ngawta an tlawm a, he inkhelah hian an captain Bruno Fernandes pawh bul ṭantu zinga telhtir a ni lo. Bournemouth laka an tlawm tak avang hian United hian inelna hrang hrangah a zawnin match riat (8) chhung chak hmel an hmu tawh lo a, hei hian an head coach Michael Carrick-a chungah pressure nasa tak a thlen ta a ni.

Thawhṭanni khan Carrington training base-ah United chief executive Omar Berrada leh sporting director Jason Wilcox te chu inhmuin, he tlawmna hnua club-in hma a lak zel dan tur leh Carrick-a hmabak chungchang sawi hoin inbiakna pawimawh tak an nei a. Thawhṭan chawhnu lam khan Carrick pawh hi Carrington training ground-ah a rawn inlan ve bawk a ni.

Carrick-a hmabak chungchangah hian zawhna leh rinhlelhna tam tak awm mah se, Manchester United hotute lam erawh an la ṭawng chhuak duh rih lo a, an manager hmabak tur chungchangah hian official thuchhuah nemnghet engmah an la siam lo a ni.

Match 8 chhung zawn a chak hmel hmu lova an awm mek avanga club boruak rit tak karah hian, Thawhlehnia player-ten training an zawm hunah Carrick-a hian hma a hruai zui zel dawn nge dawn lo tih chu football ngaihsak tute chuan an thlir ṭhap mek a ni.