Harry Redknapp chuan Manchester United boss Michael Carrick chu "a muangmar mah mah" (too laid back) tia sawiin, manager a rawn nih theih a rin ngai miah loh thu a sawichhuak. Kum 45 mi Carrick hi Redknapp-a hnuaia senior football-ah a vawikhatna atana inlan a ni a; kumin tir lam khan Old Trafford-ah lailawka a enkawl chhungin che ṭha hle mah se, a ngheta hna a chelh hnuah erawh result duhawm a nei hlei thei meuh lo a ni.
Tun kar tir lam Champions League-a Atletico Madrid laka 2-0 a an tlawm kha United tana chak nei lova a zawn a match nga an khelhna a ni ta a. Tun season chhungin Carrick-a naute hian Ipswich Town leh Azerbaijan club Sabah te chiah an la hneh a ni.
Pathianniah an elpui lian Leeds United chu Elland Road-ah an hmachhawn dawn a, hei hi match pawimawh tak a ni dawn a; hemi hnu hian Como, Bournemouth leh Chelsea te an hmachhawn zui bawk ang. Carrick-a'n Middlesbrough a enkawl ṭum pawh khan a tirah che ṭha viau mah se, kum hnih leh a chanve hnuah ban a ni a nih kha. Tunah pawh hian he dinhmun khirh tak aṭang hian a dingchhuak leh thei ang em tih chu zawhna lian tak a tling mek a ni.
The Sun chanchinbua a column ziahah Redknapp chuan, "Michael hi West Ham-a kum 12 a nih aṭang tawhin ka hre tawh a. Mahse, manager a rawn nih theih hi ka hmu ngai lo. Michael hi chhungkaw ṭha tak aṭanga chawrchhuak, mi fel tak a ni a; inkhel thunun thiam leh chhiar thiam khawpa footballer fing a ni. Mahse, tlangval ngawi chawi tak leh muangmar (laid-back) tak a ni ṭhin a, a nihna ve reng a ni.
"Khami ni a Tottenham laka United-in goal an thun khan khelmual sirah a tlan kual ve vak vak lo - goal an sut laia ball fawp nawk nawk ṭhin Roberto De Zerbi nen phei chuan an inang lo hle. Result chu a ṭha lo ngei mai, mahse a kalsual hi siamṭhaa a hna hi chelh chhunzawm zel turin ka beisei a ni, a chhan chu amah hi ka ngaina em em a ni. Naktukah hian Michael hi thlak pawh nila, tun season-ah pangana (5-na) emaw parukna (6-na) aia chungah United hi an awm thei dawn chuang lo. Chutiang chu he team ka hmuh dan a ni a, title inchuh pui thei tur dinhmunah an la ding lo hrim hrim. Hei hi Michael-a hmachhawn mek chu a ni a, tu pawh rawn thlak se an dinhmun a inang tho ang," a ti.
Result duhawm lo zawn hian Carrick-a lakah pressure a siam lian hle a, Lisandro Martinez-a'n director of football Jason Wilcox a sawisel zui bawk nen, an manager tan hian boruak a rit zual sauh a ni. Argentine defender hian nipui bazar laia squad thuam channa tur player lak belh theih a nih loh avanga hotute sawiseltu niin, Atletico lakah khan hliam vanga buaina an tawh avangin Ayden Heaven chu a khelhna pangngai lovah chhawr a ngai a, Benjamin Sesko a awm loh bawk avangin Bryan Mbeumo leh Matheus Cunha te chu tlarhma lailiah an dah a nih kha.
Martinez hian mipui hriata a lungawilohna a phawrh hnuah thuchhuah vawi hnih a siam a, a hmasa zawkah khan a thusawi chu sawifiah mah se ngaihdam a dil lo. Mahse, Instagram-a a thuchhuah pahnihnaah erawh ngaihdam a dil ta a, Carrick leh club hotute nen an inbiak tawh thu a tarlang bawk. He defender hi a thil tih avang hian pawisa chawitir (fine) a ni a, team-ah a hmun a humhim chhunzawm thei dawn em tih erawh hriat a la ni lo a ni.
