Manchester United ṭantute chuan an club neitute laka an lungawi lohna phawrhchhuah nan, club sponsor-te leh partner-te lakah internet kaltlangin beihpui (online campaign) an thlak ṭan ta.
Thawhlehni tlai khan United social media account hrang hrangte chuan internet lama dodalna (cyber protest) an kalpui tur thu an puang a. #BoycottUnited tih hashtag hmangin, United sponsor-tu company hrang hrangte hnenah review chhe tak tak pe tur te, an press office lama email thawn tur leh an social media post hnuaiahte lungawi lohna thu ziak turin fan-te an inchah a ni.
United sponsor leh partner-te hming chuanna thlalak (graphic poster) siamin, "A lian emaw a te emaw, aw i nei vek a ni. Heng company-te hnenah hian review leh social media hmangin i ngaihdan leh rilru phawrh chhuak rawh," tiin an tarlang bawk.
2024-25 season aṭang khan California-a hmunpui nei Qualcomm Technologies chuan an Snapdragon brand hmangin United jersey hma lamah hming an chuangtir ṭan a, he company hi United commercial partner lian ber a ni. Fan-te chuan Snapdragon social media page-ah club neitute laka an lungawilohna thu an thehdarh nasa hle a, Snapdragon lam pawhin fan thinrimte comment leh reply ṭhenkhat chu an thup (hide) hial a ni. United leh Snapdragon sponsorship inremna hi season khatah £60million vel man niin an chhut a ni.
Tualchhung mualpuia nawrh huaihawt ringawt chuan awmzia a nei tawk lo nia ngaihna a awm avangin, fan-te hian club sum lakluhna ber sponsor-te nawr zawnga hmalak hi an thlang ta a ni.
Kum 2005-a Glazer chhungkuain club an lei aṭang tawh khan match en ṭhintute chuan an dodal char char tawh a, thla 18 liam ta chhung khan Sir Jim Ratcliffe pawh an lungawi lohna fukna berte zinga mi a lo ni ve chho tawh bawk.
Old Trafford-a Manchester derby inkhelh hmain United fan group 'The 1958' chuan ticket hralh dan chungchanga thil dik lo chhui a nih hnuah, season-ticket neitute dinhmun humhim nan nawrh an lo huaihawt tawh a. Police lamin mi 500 vel an tel niin chhut mah se, Sir Matt Busby Way aṭanga stadium pana an kal zelah fan dang tam takin an rawn fin chho a ni.
United ṭantute lungawi lohna dang leh chu kumin nipui bazar (transfer window)-a club chet dan a ni. United hian Andrey Santos, Youri Tielemans leh Carlos Baleba te lak nan £150m an seng a, goalkeeper Karl Darlow chu a thlawnin (free-in) an la bawk. Mahse match thum ngawt chawl tawh Luke Shaw-a chhawk tu tur left-back an la lova, striker thlak tu tur lak pawh an ngai pawimawh tawk lo hle.
Chutih laiin an elpui lian Manchester City chuan league chhunga sum hmang hnem ber niin £458m ngawt an hmang a, Chelsea (£342.4m), Tottenham (£334m) leh Newcastle (£275.2m) te pawhin United aia sum tam zawk fe thehchhuakin squad an thuam chak thung a ni.
