Manchester United sum dinhmun (financial accounts) thar ber tarlan a nih danin, Old Trafford-ah hian player leh thawktute hlawh pek chhuah zat (wage bill) chu a tlahniam leh ta a ni. Kum 2025-26 financial year chhunga United sum dinhmun tarlanah hian, club chuan sum lakluh lamah £677.6m ngawt hmuin record thar an siam bawk.

He sum lakluh zat ropui tak hi Europe inelna khelh miah loh kum chhunga an hmuh chhuah a ni a. Finance lama mithiam Kieran Maguire chuan hetiang dinhmun a hmuh hnu hian, Red Devils te chu Champions League-ah an kir leh tawh dawn avangin, 2026-27 season-ah phei chuan United sum lakluh hi a la pung nasa zual dawn hle niin a sawi lawk a ni. Amaherawhchu, Maguire hian Champions League an luh theih avanga contract-a 25% hlawh tihpunna tur (pay rise clauses) a awm tel avangin, an hlawh pek zat pawh a pun chhoh leh ngei a rinawm thu a tarlang bawk.

United chief executive Omar Berrada chuan, "Hei hian Manchester United lar zia leh sumdawnna lama kan chak zia a pholang nawn leh a ni. Heng result-te hian kawng dik kan zawh mek tih nemnghet mah se, kan sum dinhmun a ngheh reng theih nan fimkhur leh fel fai taka kal zel kan tum tlat a ni," tiin a sawi.

Sum lakluh lamah record siam mah se, United hian an hlawh pek chhuah zat chu £302million-ah an tihniam thei a, 2023-24 financial year-a £313m an lo hman tawh ai khan a tlem zawk a ni. Khaikhin nan, Ineos-in club an enkawl hma, 2021-22 financial accounts-ah phei kha chuan United hlawh pek chhuah zat hi £384m lai a tling hial a nih kha.

Ineos-in Old Trafford thuneihna an lak aṭang khan, hlawh pek chhuah zat tihhniam leh hlawh pek dan phung thar (pay structure) hman chu an tum berte zinga mi a ni a. Player lak tharte hnenah Old Trafford-a an theihna an pholan hma chu hlawh sang lutuk pek mai mai an ti tawp ta bawk. Kum nga liam ta chhung khan hlawh hnem zual Paul Pogba, David de Gea leh Cristiano Ronaldo te pawhin club hi an chhuahsan vek tawh a ni.

Premier League-a an elpui lian Tottenham leh Chelsea te chuan kar liam ta mai te khan hlawh sang tak tak an sem chhuak a, chumi zingah chuan Mateus Fernandes-a hnenah kar khata £250,000 lai hlawh pek te pawh a tel a ni. Hetiang karah hian sum renchem lama hmingchhe zui mek Ineos hian hlawh sang an pek duh loh avangin thiltum sang tawk lo angin an lang nge, Glazer-te hun laia tihsual nawn tawh loh nana fing taka sum hmang zawk an ni tih chu inhnialna lian tak a siam mek a ni.