Manchester United midfielder hlui Christian Eriksen leh German club Wolfsburg te chuan inremtlang takin an inkar contract an tihtawp thu an puang ta.

Kum khat liam ta khan Manchester United-a a contract a zawh hnuah he Denmark international hian Bundesliga club Wolfsburg hi a zawm a, club tana a season hmasa ber leh awmchhunah inelna hrang hrangah match 34 zet a khel hman a ni.

Regular taka inkhel mah se, 2025-26 campaign tawpah khan Wolfsburg hi Bundesliga aṭangin an tla hniam (relegate) hlauh mai a. Tun dinhmunah German football division hnihnaah match ruk khel tawhin vawi thum hnehna an chang tawh a, palina dinhmun an luah mek a ni. May thlaa Bundesliga play-off match-a SC Paderborn laka beisei loh taka an tlawm ṭum kha Eriksen-a'n Wolfsburg tana a match hnuhnung ber a khelh a nih chu tumah rengin an lo hre lawk bik lo a ni.

Eriksen hian a ram Denmark lama haw a, football piah lama a mimal nun chhungkua nena buaipui a duh tak avangin club hotute hnenah a contract tihtawp hi a dil a ni. Inkhelh a chawlhsan (retire) tur thu chiang taka puan ni kher lo mah se, he thutlukna hi June thlaa Denmark leh Ukraine ten international friendly match an khelh laia Eriksen-a khelmuala a tluk tawp hnu thla thum leka thleng a ni a. Hemi hnu aṭang hian inelna puitling match-ah a la inlan leh miah lo bawk.

Wolfsburg official website hmanga Eriksen-a'n thuchhuah a siamah chuan, "Tun dinhmunah chuan Denmark-a ka chhungte kianga awm hnaih hi ka tan a pawimawh ber a ni. Inremtlang taka thutlukna kan siam thei hi ka lawm hle mai. Wolfsburg-a ka hun hman chhung khan hlimna leh lungngaihna tam tak ka tawng a. Bundesliga lama kir leh tura hma an laknaah club hi enkawltu ṭha tak kutah a awm tih ka hria a, VfL hian hmabak eng tak an nei ngei ang tih ka ring tlat a ni.

"VfL leh Wolfsburg-a ka awm chhunga min thlawptute zawng zawng chungah thinlung takin lawmthu ka sawi a. In tana inkhelh kha ka tan chuan thil lawmawm tak a ni a, he hun hi ngaihhlut takin ka la hre reng tawh ang," tiin a sawi.

Inkhelh laia Eriksen-a khelmuala a tluk tawp hi a vawi hnihna a ni tawh a. Kum 2021-a European Championship khelh lai khan a lungphu a chawl (cardiac arrest) thut a, defibrillator hmanga chhanhim a lo ni tawh a nih kha. Hetiang dinhmun harsa tak a paltlang hnuah khelmualah kir lehin Brentford, Manchester United leh Wolfsburg tan a khel leh thei a ni a, tunah erawh chhungkua leh hriselna ngai pawimawhin a ram lamah a kir leh ta rih a ni.