Manchester United chuan 2025/26 season chhung khan sum lakluh lamah record thar siamin, an sum dinhmun chu a hma aia ṭha zawk tura beisei a nih thu football finance expert Kieran Maguire chuan a sawi.

Ruben Amorim-a hmunruak luaha Michael Carrick-a'n mawhphurhna a lak hnuah, United chu Premier League-ah pathumna dinhmun a luahtir a. Hei hian kum thum chhung zet an inlan tawh lohna Champions League khel turin kawng a hawnsak leh ta bawk a ni. Old Trafford club thuneitu Ineos hian kum khata sum lakluh (revenue) £800m thlenpui an tum tih chu mi zawng zawng hriat a ni a, tun hnaia an sum dinhmun tarlan aṭang hian chu an thiltum chu an pan dik chho hle niin a lang.

June 30, 2026 thlenga financial year accounts an tichhuahah, United hian record thar siamin £677.6m lai sum an lalut a. Hei hi 2024/25 season-a record an lo siam tawh £667m aia tam zawk a ni a, Europe inelna an khelh loh kumah hetiang zat an lalut thei hi thil chhinchhiah tlak tak a ni.

United chief executive Omar Berrada chuan, "Hei hian Manchester United mipuina leh sumdawnna lama a huang zau zia a tichiang a ni. Heng result-te hian kawng dik kan zawh mek tih a tichiang a, amaherawhchu kan sum dinhmun a ngheh chhunzawm zel nan fimkhur leh felfai takin hma kan la chhunzawm zel ang," tiin a sawi.

Football finance expert Kieran Maguire chuan United in Focus hnenah United sum dinhmun thlirletna neiin, hmalam hun atan beiseina sang tak a neih thu a sawi a. "Manchester United hian 2026/27 season-ah chuan £750million aia tam sum an lalut thei maithei a ni.

"2025/26 season-ah khan league lama an dinhmun an siamṭhat em avangin sum lakluh an vawng ṭha thei a. 15-na aṭanga pathumna an nih chhohna ringawt pawh khan £35million hu hlutna a nei. Old Trafford-a match khelh tlem zawk avangin matchday income a tlahniam deuh na a, mahse Ineos-in match enna man an tihsan avangin a chhawk zangkhai hle a ni.

"Chuvangin chu chu a buaithlak loh. Europe-ah an inlan loh avangin commercial income tlahniam mah se, 2026/27 season-ah chuan a rawn sang chho leh ngei ang. Season tharah chuan record thar an siam ngei a rinawm. Champions League an luh avangin player tam zawk contract-ah hlawh 25% a pun theihna clause a awm a, wage bill a sang dawn a; mahse Champions League aṭanga sum lut tur hian chu senso chu a khuh hneh dawn lutuk a ni," tiin Maguire chuan a sawi.

Mahse Maguire hian Glazer chhungkaw laka club leiba pung zel chu a vei hle thung. Sum an lakluh tam rual hian club hian tax pek hma channa (pre-tax loss) £43m an tawk a ni.

Maguire chuan sawi chhunzawmin, "Sum rawn lut chu a ṭha ngei mai, mahse Glazer-ten club an lak aṭang khan an leiba pung (interest costs) ringawt pawh £1billion aia tamin a pung tawh a ni. Hei hi thil buaithlak leh ngaihven hlawh tak a la reng a, leiba neih zat pawh a sang ber dinhmunah a ding mek bawk. Hei hi ngaihtuahawm tak a ni, a chhan chu bank hnenah pound maktaduai khat kan pek liam apiang hian club hmasawnna hna, training facility, sports science leh first-team tana hman theih tur pound maktaduai khat kan hloh ziah tihna a ni," tiin a sawi chhuak bawk a ni.

Hetiang boruak karah hian, United hlawh pek zat leh sum lakluh inphut tawk dan hi UEFA duhdante aiin a la hniam ṭha hle a, hei hian squad cost ratio rules hnuaiah sum hman theihna hunṭha club hnenah a la siamsak reng thung a ni.