Manchester United striker hlui Rasmus Hojlund chuan season khat liam taa Old Trafford a chhuahsan hnuah pawh beisei angin hmingṭhatna a la nei lian tawk lo a, Erling Haaland-a hlimthla hnuaiah a la nung reng niin an ngai. Kum 2023 khan Atalanta aṭangin beiseina sang tak nen United hian la lut mah se, Harry Kane-a ang striker puitling an mamawh laia la naupang lutuk a nih bakah, Premier League club lian berte zinga mi hmahruaitu ni tura a theihna a la tawk lohzia a lang chho thuai a nih kha.
Old Trafford-a hun harsa a hman hnuin, nipui liam ta khan he Danish striker hian Italy lam panin Napoli a zawm ta a. Mahse khelmuala Haaland-a chet ṭhat em avang hian Hojlund hi khaikhin a hlawh zui reng a, tun kar Ningani zan hian Nations League match-ah Norway leh Denmark an inhmachhawn dawn a, United a chhuahsan hnuah Hojlund leh Haaland te hi inelna tak takah an vawikhat inhmachhawnna tur a ni bawk.
He inkhel hmachhawn tur hian Denmark lam chu hliam vangin an buai hle a, Andreas Christensen, Alexander Bah leh Kasper Dolberg te an chhawr thei dawn lo a ni. He match preview chungchanga Norway lam chanchinbu mi Jasper Mathisen-a'n Snakk Sport hnena a thusawi chu TV2 chuan tarlangin, Hojlund chu online hmanga bungraw tlawm zawrhna lar Temu hming chawiin Haaland-a 'Temu version' tiin a sawi chhuak hial a ni.
Mathisen chuan, "Denmark hian tlarhmaah Rasmus Hojlund an kawl a, amah hi Haaland-a 'Temu version' ang deuh tura ngaih a ni a. Mahse Norway tlarhnung hrem thei khawp theihna erawh a nei a ni," tiin a sawi.
Tun season chhungin Hojlund hian Napoli tan match 6 a khelhah goal hnih chauh a la khung a, Manchester City tana game 7 a khelha goal 7 khungtu Haaland nen chuan a inthlau hle reng a ni. United lam pawhin Slovenian striker Benjamin Sesko chu striker tha bera chher chhoh an tum mek laiin, Sesko-a'n a chawn hliam a tawrh avangin an la buai chhunzawm bawk.
Norway national team head coach Stale Solbakken erawh chuan Hojlund leh Haaland te inkhaikhin chu a dik loh thu sawiin, Temu nena hmehbel a nihna chu a chhang let ve thung a ni. Danish chanchinbu Bold hnenah Solbakken chuan, "Tlangpui thuin, Erling Haaland nena inkhaikhin hi khawvel mi tupawh tan thil dik lo a ni. Khawvel khawiah pawh mi tupawh nise a inthlau em em ang.
"Rasmus hi taksa tharum nei ṭha, ke veilam hmang thiam tak leh penalty box chhung pawh tibuai thei tak a ni. Goal khung kawngah chuan Erling-a ang em emin goal ropui a khung tam lo a ni maithei e. Rasmus hi international striker ṭha tak a ni a, mahse Erling nena khaikhin kher erawh thil fair lo tak a ni. Rasmus hi Manchester United-ah a kal a, Haaland hi khami hun lai vel bawka Manchester City zawmtu a nih vangin hetiang inkhaikhinna hi a piang chhuak ta a ni," tiin a sawifiah a ni.
