Champions League-a Atletico Madrid laka an tlawm hnuah, Manchester United defender Lisandro Martinez chuan club hotute chet dan leh transfer bazara an chet ṭhat tawk loh chungchang a sawisel hrep a nih kha. Hemi chungchangah hian Martinez chuan club thuneitu lian te hnenah inremna leh boruak tihdaihna tur inbiakna a neihpui ta a ni.
He Argentina international hian nipui transfer bazara United chet chhiat zia a sawichhuah khan pundit tam takte aṭangin sawiselna nasa tak a tawk zui nghal a. Pundit-te hian Martinez-a khelh dan phung (form) tlahniam chu sawiselin, a thil sawi tum tak - nipui bazar laia squad thuamchak a nih tawk loh zia erawh an hlamchhiah thung a ni.
Martinez chuan social media lamah thuchhuah dang siam lehin, a ṭawngkam hman danah ngaihdam a dil a, hma lam match lo awm turte atana theih tawp chhuah a, team puih chauh a rilruah a awm thu a tarlang leh a ni. Sky Sports tarlan danin, Martinez hian club hotu Omar Berrada, technical director Jason Wilcox leh head coach Michael Carrick te hmuin inbiakna a nei a. The Mail thudawnna chuan United lam hian he thubuai hi 'chinfel tawh' (closed) anga an ngaih thu a tarlang bawk.
Manchester United tan chuan he buaina hi rang taka titawp a, kal pelh vat chu thil thlakhlelhawm tak a ni ngei ang. Mahse Martinez-a ṭawngchhuahna hian thla tlemte kalta chhung khan he club hi hruaitute'n an enkawl chhe hle tih a phawrh chiang em em a ni. Manchester United ṭantute tan erawh chuan, Jason Wilcox-a chungchang hi a la tawp ve hauh lo thung.
He inbiakna neih hian Martinez-a lungawilohna leh harsatna hmuhte hi a sutiang kher ang em tih chu a rinhlelhawm hle a ni. Atletico Madrid an hmachhawn ṭum pawh khan, United hian centre-forward pangngai pakhat mah kawl lovin match an khel a, kum 20 mi centre-back chu tlarhnung veilamah (left-back) chhawr an ngai bawk a nih kha.
Technical director Jason Wilcox hian Benjamin Sesko leh Luke Shaw te hliam theihna dinhmun leh an dinhmun derthawng zia chu a hre chiang hle a, mahse nipui transfer bazar chhung khan hetiang dinhmun phuhruk tur hian player thar lakluh nachang a hre lo a ni. Heng buainate hi tun maia chinfel theih a ni tawh lo a, Sesko leh Shaw te hliam harsatna hian zuihral mai lovin hun a la duh dawn a ni.
Wilcox-a laka Manchester United ṭantute ngaihṭhat lohna hi a aia thuk a la awm zawk bawk. Club-a a awm chhung zawng hian amahah mawhphurhna lak duhna (accountability) a tlem hle a. Chanchinbumite hmaa a inlan vawikhatna leh awmchhun chu nikum lam khan niin, hnehna an zawn lai vel khan MUTV hnenah chauh inkawmna a lo nei tawh a ni.
Wilcox-a laka mi ngaihdan leh rinhlelnate a reh theihna kawng awmchhun chu team hian match hneh zawn chho a, Premier League table-a an insawn chhoh theih chauhvin a ni ang. Chutih rualin Wilcox hi buaina awm zawng zawng bulpui a ni vek bik lo a, Ineos leh Sir Jim Ratcliffe-a hnuaia club enkawl danah fan-te hi an lungawi lo hle tawh a, ticket man tihpun aṭanga buaina hrang hrang thlengin an ngaithei lo hle.
Martinez-a thuchhuah khan Ineos thiltih dan a phawrhchhuak a, social media-a ngaihdam dilna tlar tlemte hian he buaina hi a khar fel ang tih United lamin an ring a nih chuan an tisual der a ni ang.
