Ningani zan khan Manchester United aṭanga loan-a chhuak goalkeeper Andre Onana chuan European football-ah hmel a rawn inlar leh a. Europa Conference League inkhelah Turkish club Trabzonspor chuan khualmualah KuPS chu 4-2 in an hneh a ni.

He Cameroonian goalkeeper hi kumin season bul an ṭan tirh aṭangin Trabzonspor tana player rintlak berte zinga mi a ni chho a, an club pawh league-ah pangana (5-na) dinhmun an luah mek bawk. KuPS lakah hian Turkish club hian 3-0 in hma an hruai fal hman a, mahse Onana hian hun rapthlak tak tawng lehin, corner kick aṭanga ball rawn kal chu a chhuah palh hlauh a ni.

He goal hi kum 2024-a Manchester United tana a khelh laia Wolverhampton Wanderers laka goal a chhuah tawh nen khan a inang hle a, khatih ṭum khan Wolves forward Matheus Cunha chuan corner aṭangin a lo khung tawh bawk a ni.

Mahse he United keeper hian a tihsual chu reilotê hnuah a rawn siamṭha leh nghal a. KuPS-in score 3-2 a an rawn siam theihna tur penalty an hmuh chu dinglamah bawhin ṭha takin a lo dansak a, hei hi Trabzonspor chak theih nana chhanhimna (save) pawimawh tak a ni chho ta a ni. Hun pek belh minute 96-naah goal hnihna a chhuah leh bawk a, mahse khatih lai kha chuan inkhel a tawp fel der tawh a ni.

He match chhung hian Onana hian save vawi ruk (6) ngawt a nei a, chung zinga pali chu penalty box chhung aṭanga tumpuiten an pet dan a ni. Ball punch vawikhat a nei a, box pawnah tlan chhuakin an tlarhnung a rawn thianfai bawk. Amaherawhchu ball pass lamah erawh a che ṭha tawk lova, a ball pass 56% chauh a thleng a, ball vawrh thui (long balls) phei chu 22% chauh a dik a ni. Clearance vawi hnih neiin, inbeihna (duel) a neih awmchhun chu a la bawk.

Trabzonspor leh Onana hian Thawhṭan zan hian inkhel lian tak hmachhawn lehin Besiktas an tum dawn a. Tun dinhmunah Trabzonspor hi an hmachhawn tur Besiktas ai hian point hnihin an hniam a, hmahruaitu Galatasaray lakah point thumin an hnufual mek bawk a ni.