Manchester United midfielder hlui Ander Herrera chuan tun hnaia sawisel tawk mek an captain Bruno Fernandes chu a chhan tlat a, khelmual chhung leh pawna a inpekna chu fakawm a tih thu a sawi.

Kum 2014 khan Spain midfielder Ander Herrera hian Athletic Club aṭangin Red Devils hi a zawm a, kum nga chhung hun a hman hnuah contract thar chungchanga inremna an neih theih loh avangin 2019 khan a thlawnin (free agent) a chhuahsan a nih kha. United tan hian inelna hrang hrangah match 189 inlanin goal 20 a khung hman a ni. Hemi hnu hian Paris Saint-Germain-ah hun hmangin, a hnuah a club hlui Athletic Club leh Real Zaragoza lamah a kir leh a ni.

Bruno Fernandes hi season liam ta khan a che ṭha em em a, Premier League Player of the Season chawimawina dawngin, league season khata assist ngah ber record thar siamin assist 21 ngawt a nei a nih kha. Kumin August thlaa Ipswich Town laka hat-trick siamin season thar bul ṭan ṭha viau mah se, tun hnaiah erawh team pumpui chet chhiat rualin a theihna sang tak a phochhuak thei rih meuh lo a ni.

'Rio Ferdinand presents' podcast-a a inlan ṭumin, Herrera chuan he United star hi a chhan tlat a ni. Herrera chuan, "Kei chuan hruaitu ṭha tak (leader) ah ka ngai a ni. Kum tam tak leh season tam tak chhung chu Manchester United hi a kokiah a pu a ni ber e. Amah chauha khel ang maiin a awm ṭhin a, amah chauh ka ti kher lo na a, he club chanchin ropui tak hi a kokiah a phur a ni," tiin a sawi.

Sawi chhunzawmin, "Hun harsa tak karah pawh a tlanbo ngai lo a, ball ngenin, goal khung leh midang siamsakin hma a hruai reng ṭhin. Inkhela an tlawm hnu pawhin chanchinbumite hmachhawnin a inpeih reng bawk. Club tana a thil lo tih tawh zawng zawngah hian ka zah em em a ni. Club hi chhuahsan thei a ni a, mahse he hmunah hian la awmin hun harsa karah a hmai a la hlim ngam tlat a, fak a phu takzet a ni. Bruno hi engtin nge buaina ber a nih theih ang? Ṭum tam tak chu harsatna sutu ber a ni zawk ṭhin," a ti.

Herrera hian tun hnaia dinhmun derthawng taka awm manager Michael Carrick pawh a thlawp tlat thu a sawi lang bawk. "Manager-te leh coach-te hian thil ṭha an din theih nan hun pek an ngaiin ka hria. Carrick hi he hna thawk thei tur mi dik tak chu niin ka hria. Mi dik tak ni turin ka duh a, club-a nomawi rawn thlen theitu tur a ni tih pawh ka ring tlat a ni. Kum hnih emaw kum thum emaw hnuah Premier League a la ang em tih chu ka hre lo, mahse chumi thleng thei tur chuan a inel dawn chiang a ni," tiin Carrick-a lakah rinna a nghah thu a tarlang.

Spain midfielder hian Old Trafford a chhuahsan dawn laia club-in an chettir dan chuan a thinlung a tihnat thu a sawichhuak bawk a. Kum thum a awm hnu khan club-ah a hlim em em a, cham chhunzawm zel a duh thu a sawi.

Herrera chuan, "Min tina em emtu chu club-a ka season ngana tur kha automatica pawtsei a nih tur thu lehkha min rawn thawn kha a ni. Phone call pawh min rawn pe lo va, 'Ander, cham turin kan duh che' pawh min ti lo. Lehkha mai min rawn thawn a ni. Kha lehkha ka hmuh khan, 'Ka zo ta e' ka ti rilru a, ka thinlung chu a na nghal vawng vawng mai a ni," tiin a sawichhuak bawk.