Manchester United hian khawvel hmun hrang hrang aṭangin player ropui leh ṭha tak tak an lo chhawr nual tawh a. Mahse khawvel hmun ṭhenkhat aṭangin player an lalut hnem bik hle a, chutiang karah chuan khawmualpui lian tak ni mah se Asia aṭang erawh chuan United player ni thei an la tlem hle a ni. He biala mihring tam zia leh United ṭantu an tam zia ngaihtuah chuan a mak zawk hial awm e. Old Trafford-a senior team tana lo inlan tawh Asia khawmualpui player-te chanchin chu hetiang hi a ni:

1. Park Ji-sung

He South Korean midfielder hi United tana lo khel tawh Asian player zawng zawng zinga hlawhtling ber leh hmingthang ber a ni chiang hle. Kum 2005 khan Old Trafford a zawm a, kum 2012-a a chhuahsan thleng khan nomawi tam tak a chawi hman a, chung zingah chuan kum 2008-a Champions League nomawi an lak pawh kha a tel a ni. Park-a theihna langsar tak chu thapui thawh a chawl lova a tlan kual reng theihna (energy ngah tak) leh team tana a inpekna ropui tak kha a ni. Goal khung hnem ber ni lo mah se, match pawimawh bika goal khung thei player niin hming a chher a, a bik takin Arsenal lakah goal a khung zing hle a, kum 2009 Champions League semi-final-a Arsenal laka a goal khung pawh kha theihnghilh a ni tawh lo ang.

2. Shinji Kagawa

Kagawa hi kum 2012 khan Borussia Dortmund aṭangin United hian an lalut a, Red Devils tana lo inlan thei Japanese player awmchhun a la ni reng a ni. United tan hian inelna hrang hrangah goal ruk a khung a, club a zawm season hmasa berah Premier League nomawi a chawi nghal a ni. Mahse a hnu lamah a hun hman a fuh zui ta lo a, season hnih chauh Old Trafford-a a awm hnuin a club hlui Dortmund-ah a kir leh ta a ni.

3. Dong Fangzhuo

Dong hi Manchester United tana la inlan thei Chinese player awmchhun a la ni. He Chinese striker hian club tan hian vawi thum match a khel hman a, chung zingah chuan Premier League-a Chelsea an hmachhawn ṭum pawh a tel a ni. Mahse United-ah hian hmun nghet a chang zui thei ta lo a, khawvel football sang ber huangah hian sulhnu lian tham a hnutchhiah zui ta lo a ni.

4. D'Mani Mellor

Mellor hi United youth academy aṭanga rawn inzir chhuak a ni a, senior level-ah vawikhat chauh a inlan hman a, club hi a chhuahsan zui ta a ni. England-a piang leh seilian ni mah se, tunah hian Macclesfield striker ni mek hian ram tana khelh kawngah erawh Yemen ram aiawh a thlang ta zawk a, tun thleng hian Yemen tan match thum a khel tling tawh a ni.

5. Zidane Iqbal

Iqbal pawh hi United academy chhuak tho a ni a, Manchester khawpuia piang ni mah se international level-ah chuan Iraq ram aiawh a thlang a ni. A career-a a thil tawn ropui leh hriatreng tawh tur chu kum 2026 World Cup inelna liana a ram Iraq aiawha a inlan kha a ni a, rawlthar theihna nei ṭha a nih zia pholang zeltu a ni bawk.