Manchester United midfielder hlui Ander Herrera chuan tun hnaia United boruak chhe mek karah an captain Bruno Fernandes a chhanhim a, chumi rual chuan head coach Michael Carrick chu nomawi inchuh thei team din turin hun pek a ngai tih a sawi bawk.
August thlaa Ipswich Town laka hat-trick siamin season ṭan ṭha viau mah se, Fernandes hian season liam taa a theihna sang tak a phochhuah ang kha tun season-ah chuan a la chhawm nung thei meuh lo a ni. 'Rio Ferdinand Presents' podcast-a a inlan ṭumin Herrera chuan, United buai chhung zawnga Fernandes-a'n mawhphurhna a lo lak tawhte chu tun dinhmuna an sawiselna avang mai hian hlamchhiah chi a nih loh thu a sawi chhuak a ni.
Herrera chuan, "Ka ngaihdan chuan ani chu hruaitu (leader) dik tak a ni. Kum tam tak leh season tam tak chhung chu Manchester United hi a kokiah a pu tawh ṭhin a ni," tiin a sawi a. Hun harsa tawpkhawkah pawh Fernandes hian ball a dil ngam a, goal a khungin assist a nei ṭhin a, an tlawm chang pawhin chanchinbumite hmaah huai takin a inlan ngam ṭhin tih a sawi lang bawk.
United tlahniam mek avanga an captain khelh dan leh a mawhphurhna uluk taka thlithlai a nih mek laiin hetiang hian Herrera hian a rawn chhan a ni. Spaniard midfielder hlui hian Fernandes chu club chhuahsan thei reng a nih lai pawhin hun harsa hmachhawn turin a cham tlat tih sawiin, tun hnaia an sawiselna hian club tana a thil lo tih tawhte a hliahkhuh chu a dik lo tih a tarlang bawk. Herrera chuan Fernandes chu United tan buaina a nih ngai loh thu leh buaina chinfelna zawk a ni fo ṭhin tih a nemnghet a ni.
Hemi bakah hian Herrera chuan head coach Michael Carrick-a tana dawhtheihna lantir a ṭul zia uar takin a sawi bawk a, Carrick hian Old Trafford-ah nomawi a rawn hawn theih ngei a rin thu a tarlang. Coach tharte tan eng emaw din chhuak turin hun an mamawh ṭhin tih sawiin, United-a a khelh lai ai khan tun dinhmuna Premier League inelna chu a khirhkhan tawh zawk hle tih a pawm bawk a ni.
Kum 2014 khan Athletic Club aṭangin Herrera hian Old Trafford hi a zawm a, 2019-a free agent-a a chhuah hma khan inelna hrang hrangah match 189 inlanin goal 20 a khung hman a ni. Hemi hnu hian Paris Saint-Germain, Athletic Club leh Real Zaragoza-ah te a khel zui bawk.
A chhuah dan chungchang sawichhuakin, amah biaka inbiakna neihpui lovin lehkha (letter) hmangin a season nganaa a contract pawhsei a nih thu club-in an hriattir mai kha a rilru a nat thu a sawi a, United-a cham zui zel a duh laiin khatia an chet dan khan a ti na hle a ni.
Kum hnih emaw thum emaw hnuah United-in Premier League title an lak theih dawn em tih zawhna chu chhangin, Herrera chuan title lak ngei chu a tiam thei lo na a, Carrick-a naute hian nomawi inchuh thei khawpa theihna erawh an nei ngei ang tih a rin thu a tlip ta a ni.
