Manchester United defender hlui Gary Neville chuan club chet chhiatna chu December emaw January thleng a kal zui zel a nih chuan head coach Michael Carrick-a dinhmun a derthawng hle dawn tih a sawi chhuak.

Elland Road-a Leeds United 1-1 a an draw hnuah Manchester United hian chak nei lovin a zawnin match ruk an hmachhawn ta a, Premier League table-ah pawh 13-na dinhmunah an tla thla ta hial a ni. Carrick-a naute hian season liam taa Premier League-a awm sa team lakah vawikhat mah hnehna an la chang lo bawk.

Neville chuan an league match lehpek tur Bournemouth an hmachhawn tur chu Carrick leh a naute tan thil pawimawh tawpkhawk a nih thu sawiin, kar tlemte chhung hian an dinhmun an siamṭhat a ngai tawh takzet tih a tarlang. Chutih rualin, Leeds laka 1-1 a an inhnehtawkna erawh hmalam pan theihna tura ke pen hmasaber a nih theih thu a pawm ve bawk.

'The Gary Neville Podcast'-ah Sky Sports pundit Neville chuan: "Tun dinhmunah chuan squad standard a hniam a, beiseina pawh a sang lo hle. Mahse hei hi Michael Carrick tan chuan rahbi pawimawh tak leh Premier League-a vawnchhan tur ke pen hmasa ber ang a ni thei a ni.

"Heta ṭang hian inrintawkna an nei thei ang a, inkhelh dan phung thar pawh an duang chhuak maithei a ni. Matheus Cunha, Marcus Rashford leh player dangte bench aṭanga an rawn luh a ngai a nih pawhin, tlarhnung nghet zawk neih tura ṭan lak a ngai a ni," tiin a sawi.

Elland Road-a an inkhelhah khan Cunha chu hun tawp dawn lamah substitute-in a lut chauh a, Rashford erawh khelmualah a inlan miah lo thung.

United dinhmun tur thlir chungin Neville chuan golf khelh tehkhin thu hmangin: "Pali-naa an awm a nih chuan 'birdie' a ni ang a, panga-na chu 'par' a ni ang, paruk-na chu 'bogey' a ni thung ang.

"Mahse top five pawn lamah chuan an awm thiang tawh lo, a chhan chu top five-a an awm loh chuan Champions League an khel thei dawn lo a, chu chuan zualko lam a panpui dawn a ni. Champions League khelh duh player ṭha lakluh an har dawn a, sum tam tak hmuh tur £60m aṭanga £70m an chan bawk ang a, Ningani zana Europa League khelh chu an hmabak a ni mai dawn a ni.

"Michael Carrick-a'n hmalam a pan theih nan leh Manchester United-in sum an thehchhuah zel theih nan panga-naa awm chu an tihmakmawh a ni tawh.

"January thlaah 13-na dinhmuna an la ding a nih chuan Carrick hian buaina lian tak a hmachhawn dawn a ni. Game sarih aṭanga point sarih chauh an la nei hi chu season ṭan tir a la nih avangin 'a la inṭan chauh' a la tih theih a, mahse game 15 hnuah chuan chutiang sawi chu a theih tawh dawn loh.

"Kar tlemte chhung hian inthlak danglamna a awm ngei tur a ni. Bournemouth inkhelh a pawimawh em em a, khualmuala Chelsea an tlawh tur nen, heng inkhel inkara a naute a enkawl dan tur hi a pawimawh ber a ni.

"Panga-na dinhmun tal luah tura beisei an ni a, panga-na aia hniam chu beidawnna lian tak leh standard tlak hniamna a ni ang. Tun dinhmunah chuan chumi thleng tur chuan an la hniam hle a; Brighton, Liverpool leh Aston Villa te en ila, an ni chu an rawn insiamṭha ṭan a, United tan chuan a harsa tawh hle a ni," tiin a sawi zui bawk.