Manchester United defender Lisandro Martinez chuan kumin nipuia club transfer kalpui dan chungchangah lungawilohna lian tak phawrhchhuakin thuchhuah a siam a, hei hian technical director Jason Wilcox chu mit fukna berah a chantir mek a ni. Mahse, United midfielder hlui Paul Scholes chuan Wilcox hi chhanin, a dinhmun khirh tak chu a hriatthiampui thu a tarlang thung.

'The Good, The Bad & The Football' podcast-a a inlan tumin, Scholes chuan Wilcox-a mawhphurhna chu football khawvela hna harsa berte zinga mi a nih thu a sawi a. Scholes chuan, "Martinez-a sawi hian dikna chen a nei maithei, mahse hetiang thu sawi hi a tih tur a ni lo. Jason Wilcox hi tlem chu ka chhan ve dawn a ni, a chhan chu a hma pawhin kan lo sawisel ve fo tawh ṭhin bawk a.

"Jason-a hi hetiang hna thawh chiah tura club rawn zawm a ni lo. Ani chu technical director a ni a. Hre reng ula, Dan Ashworth kha an ruai hman a, Ashworth khan Sir Jim Ratcliffe-a thil tih duh ṭhenkhat a hnial ngam nia hriat a ni a, chuvang chuan tun dinhmunah phei chuan hei hi football khawvela hna harsa ber a tling hial ang. Jason-a hian sum hman tur nei ṭha miah si lovin Man United hi a hmun ngaia hruaikir leh a tum a ngai miau a ni," tiin a sawi.

Kumin nipui transfer bazar chhung khan Manchester United sum thehchhuah zat chu Manchester City, Chelsea, Liverpool, Arsenal leh Tottenham te thehchhuah zat ai pawhin a tlem zawk a ni. Scholes chuan Wilcox leh United scouting lamte chuan player tha ber berte an hip zo tawh lo tih a tarlang bawk.

Scholes chuan sawi zawmin, "Kum 20 chhung emaw, club-a kan awm chhung zawng khan sum hmang hnem ber kan ni ziah ṭhin a. Player ṭha ber berte chu awlsam takin kan lalut thei ṭhin. Tunah erawh chuan chutiang chu an ti thei tawh lo a ni. Man United hming ringawt pawh hian player a hmin thei viau ṭhin emaw ka ti a... Mahse he mawhphurhna chelhtu Jason-a tan hian tunah chuan a harsa tawh takzet a ni. Ka sawi tawh ang khan, sum an neih loh chuan player ṭha chungchuang an chang thei tawh dawn lo. Tun dinhmunah chuan Manchester United hian hralh theih tur leh pho chhuah theih danglam bik eng emaw an neih a ngai tawh a ni," tiin a sawi.

Tun hnai transfer window hrang hrangah United hian an ngaihven tak Elliot Anderson leh Antoine Semenyo te chu Manchester City lakah an chan a. Mateus Fernandes leh Sandro Tonali te pawhin hlawh leh sum hlawk zawk an dawn avangin Tottenham an pan bawk a, Bruno Guimaraes pawhin Arsenal a zawm ta bawk a nih kha. Hei hian United chu an ruahmanna thlak a, tlem zawka sum hmang tura a nawr phah hial a ni. Club transfer record phei chu kum 2016 daih tawh khan siam a ni a, vawiin thlengin an la khum leh lo a ni.

Sum sen an hreh lutuk vang chauh ni lovin, man to tak tura chhiar player tam tak chuan Old Trafford aia hmun dang pan an thlan zawk ṭhin vang a ni bawk. Scholes-a thusawi hian dikna chen nei mah se, kumin nipui chhung khan striker leh left-back position-ah hliam vanga harsatna a awm chiang hle chung pawha Wilcox-a'n heng hmunruak luah khat tura player a lalut lo chu zawhna lian tak la awm reng a ni a, he thil hian team chu tun thlengin a la tibuai chhunzawm zel a ni.