Spain rama England Under-20 leh Germany inhmachhawnnaah Manchester United midfielder Jack Fletcher chu direct red card hmuin hnawhchhuah a ni ta.

Darren Moore-a naute 1-0 a an hmahruai laiin, first-half tawp dawn ṭepah kum 19 mi hian khingpui player lakah tackle hlauhawm tak a neih avangin referee-in red card a pe nghal a ni.

The Sun chanchinbuin a tarlan danin, Fletcher hian Germany player Boris Lum chu a pheikhawk hnuai (studs) lang vekin a khup zawn velah na takin a tlawh a. Referee thutlukna siam chu he rawlthar hian reilotê chhung chu a hnial ve hman na a, mual a chhuahsan zui ta tho a ni.

International break chhunga England match hmasa pahnih (Italy leh France) an hneh ṭum khan Fletcher hi bench-ah a ṭhu a, Germany laka match thumna an khelh ṭum hi bul a ṭan hmasak ber a ni. He inkhelah hian United academy chhuak player pali ngawt mai - Jack Fletcher, Shea Lacey, Harry Amass leh Ayden Heaven te chuan bul an ṭan a.

Red card avanga Fletcher hnawhchhuah a nih tak hnuin, chawlhlawk (half-time)-ah manager Darren Moore chuan Lacey chu la chhuakin United midfielder dang Jim Thwaites a luhtir ta a ni.

Mihring 10 chauhva an khelh chung pawhin, second half ṭan tir lamah Kian Noble chuan Young Lions tan goal hnihna a khung a. Germany lamin goal khat rawn sut ve mah se, England hian an goal neih humhim zuiin 2-1 in hnehna an chang a, match thum khelhah vawi thum chakna an chang ta a ni.

Jack Fletcher hi Manchester City academy aṭanga United rawn pan a ni a, England tan Under-15 aṭanga Under-19 thleng a inlan kim vek tawh a, Scotland Under-16 tan pawh a lo khel tawh bawk. Nikum December thla khan manager hlui Ruben Amorim-a hnuaiah Aston Villa lakah United senior debut a siam a, hemi hnu hian Newcastle leh Wolves lakah bench aṭangin a inlan leh bawk. A pa Darren Fletcher-a'n January thlaa Burnley leh Brighton laka caretaker manager hna a chelh ṭum khan bench-ah a ṭhu bawk a ni.

A phirasapui Tyler Fletcher erawh head coach Michael Carrick-a hnuaiah senior team-ah a inlan tam zawk a, Tottenham leh Brighton laka an chak ṭumte khan a inlan a, August thlaa Dublin-a Leeds United nena friendly an khelh ṭum pawh khan bul a ṭan a ni.

Jack Fletcher hian kumin March thla khan mipat hmeichhiatna lama mi inhmuhsitna ṭawngkam (homophobic slur) a hman avangin match 6 chhung hremna a lo tawk tawh a. Khatih lai khan ngaihdam dilin, "Hetiang ṭawngkam hman hi thil pawmzam rual a ni lo tih ka hria a, match zawh khan ngaihdam ka dil nghal a ni. Ka miziaa tlin lohna reilotê lo chhuak hi ka rin dan leh ka nungchang phawkchhuaktu a ni lo tih tihchian ka duh a ni," tiin a lo sawi tawh a nih kha.

Germany lakah hian England hian hnehna chang mah se, he red card hian Fletcher-a tan nghawng thui tak a nei thei a, hremna a tawk zui dawn em tih chu thil ngaihven hlawh tak a ni chho leh dawn a ni.