Manchester United chuan an manager Michael Carrick-a an ban a nih palh hlauh chuan, an manager thar atan Newcastle United boss hlui Eddie Howe lakluh an ngaihtuah mek.

Season ṭan tir lamah League Cup aṭanga an tla leh, Premier League match nga liam taa vawikhat chiah an chak chungin, international break chhung khan Carrick hian a hna a la hum hram hram a ni. INEOS lamin season ṭan tir teah manager ban hi an duh rih lo a, international break zawhah pawh Tottenham Hotspur leh Atletico Madrid hmachhawn turin Carrick-a hian team a la hruai zui rih dawn a ni.

Football Insider-in a tarlan danin, Manchester United hian Michael Carrick-a ban mai tumna ruahmanna an la nei rih lo a, mahse thutlukna dang an siam a ngai a nih hlauh chuan kum 48 mi Eddie Howe hi "a thlaktu tur atan mi rementik" ah an ngai a ni. English coach Howe hi Newcastle a chhuahsan hnu aṭang khan club enkawl mumal lovin a la awm mek a, Old Trafford lamin an ngaihven zui takzet nia tarlan a ni.

Howe hi Premier League huangah zah a hlawh hle a, Old Trafford-ah pawh amah faktu leh duhsaktu an tam hle a ni. Report-in a tarlan danin, Howe hian United-in an phut thil pawimawh pahnih a tlin chiah a, chungte chu Premier League leh Champions League-a tawn hriat ṭha tak a lo nei tawh hi a ni.

Howe-a manager career-ah hian thil ropui tak tak a lo thleng tawh a, Bournemouth chu English football-a division 4-na (League Two) tawp ber aṭangin Premier League thlengin a lo hruai chho tawh a ni. Hemi hnu hian St James' Park panin Newcastle United head coach hna a chelh a, Magpies hi ṭum hnih ngawt Champions League khel turin a tlinpui bakah, kum 2025 khan kum 70 chhung ram chhung nomawi (domestic trophy) an lo lak tawh lohna chu tihtawpsakin League Cup a chawipui a nih kha.

Howe hi tun dinhmunah manager hna zawm leh nghal mai turin a hmanhmawh rih lo nia hriat a ni a, mahse Manchester United mamawh phuhruk thei a nih avangin an manager thar ni thei tur zinga beiseina sang ber berte zinga mi a rawn ni chho mek a ni.