Manchester United chuan an academy rawlthar theihna ngah JJ Gabriel-a hmabak tur chungchangah chhanna chiangkuang an dawng thuai dawn ta a, vawiin hian he rawlthar hian kum 16 a tling ve ta chiah a ni. EU passport kawltu a nih tel avangin, FIFA dan khauh tak hnuaiah phalna a hmu a nih chuan, Gabriel hian European Union chhung club dangte nena inremna ziah theihna hun remchang a nei thei tawh dawn a ni.
Thla liam ta khan Gabriel-a aiawhtute chuan Old Trafford chhuahsan duhna lehkha United hotute hnenah an thehlut thut a. A chhan ber chu Gabriel-a aiawhtute hian Champions League-a Sabah an hmachhawn ṭum khan first-team debut siamtir an phut a, mahse United chuan UEFA hnena squad an thehluhah a hming an telh ve lo a ni. Chu bakah Carabao Cup-a Brighton an hmachhawn ṭum leh Premier League-a Bournemouth an tum ṭumah te Gabriel hi chhawr ngei an phut bawk nia hriat a ni.
United hian Brighton an hmachhawn zan khan Gabriel hi khelhtir a, first team debut siamtir an lo tum rilruk reng tawh a, mahse chu match khelh a nih hma chiah chuan a aiawhtute lam hian club chhuahsan dilna hi an thehlut ta thung a ni. Khami ṭum khan kum 15 mi lek la ni Gabriel hian inkhel ta se chuan, Manchester United chanchina senior team tana inlan thei naupang ber record a siam hial dawn a ni.
A hmabak tur a la chian theih meuh loh chhung hian kar engemaw zat chhung chu Gabriel hian Castelldefels, Barcelona-ah training a lo nei tawh a. Barcelona sporting director Deco chuan he rawlthar hi an ngaihven lutuk lo angin sawi mah se, Real Madrid leh Barcelona te chuan Gabriel lakluh theih dan chungchangah inbiakna an lo nei tawh a ni. Spanish club lian pahnihte hian kum 18 hnuailam player lakluh chungchanga FIFA dan khauh tak awmte chu fimkhur taka bawhzui a ngai tih an hre chiang hle a, United lam pawhin dan anga hma lak theih dan kawng an zawng maithei a ni.
Heng club pahnih bakah hian Bayern Munich leh Paris Saint-Germain te pawhin Gabriel hi an ngaihven hle bawk. Mahse Gabriel hian ram pawn club a pan a nih chuan, United hian an academy enkawl man (training compensation) chauh an dawng dawn a, chu chu £100,000 aṭanga £300,000 inkar vel chauh a tling dawn a, £250,000 bawr vel nia sawi a ni bawk. Hmanlai khan West Brom rawlthar Louie Barry pawh khan scholarship contract an pek loh avangin FIFA thutlukna hmangin a thlawnin Barcelona a lo pan tawh a. United chuan hetiang dinhmun hi thleng nawn lo tura an sum hmuh theih tur humhim nan vawiin aṭang hian scholarship contract hi Gabriel hnenah hian an chhawpchhuak ngei dawn nia ngaih a ni.
Gabriel lalut tur club chuan FIFA hnenah dilna thehlutin football lama hmasawnna, zirna leh a himna chungchangte an ngaihtuahsak thei tih an fiah a ngai dawn a. Mahse Gabriel-a aiawhtute hian heng dan khirhkhan hi an paltlang thei dawn tih an chian tawk loh chuan chhuah an nawr ngawt a rinawm loh a ni. Gabriel-a'n club thar a zawnna kawngah hian football khawvela agent lar, Epic Sports dintu Ali Barat chuan hma a la mek bawk a ni.
