Manchester United Women Under-21 team chuan hlawhtlinna ropui tak chang lehin, Professional Game Academy (PGA) season-a phase hnihna (Phase 2) atana Division 1-ah hmun an in-vawng fel ta tih club lamin an nemnghet.
PGA league inelna hi a tir lamah chuan hmun hnihah ṭhen phawt niin, hmarlam bial (north group) leh chhimlam bial (south group)-ah inṭhenin Phase 1 hi an khel phawt ṭhin a. Heta an chet dan azirin Phase 2-ah hian ram pum huap national section hnuaia Division 1 leh Division 2-ah team-te hi dah hran an ni ṭhin a ni.
He dinhmun ropui tak thleng tur hian United Women Under-21 te hian game ruk khel tawhin, point 13 hmuin hmarlam table-ah pakhatna (a chung ber) an luah a, goal difference hmangin Liverpool chu an khum ṭawk ṭawk a ni. United hian hmahruaitu dinhmun luah tur hian Liverpool, Sunderland, Durham leh Newcastle United te an hneh a ni.
Hetianga hlawhtlinna ropui tak an neih hnu hian United Women's Academy manager Amanda Goodwin chuan a naute chet dan chu fakin, "Hmarlam division-a pakhatna nih a, National PGA League Division 1 khel tura an tling hi ka player-te chungah hian ka chhuang takzet a ni," tiin a sawi.
Goodwin-i chuan sawi zawmin, "League-a chungber nih hi hlawhtlinna ropui tak a nih rualin, hemi piah lamah hian mimal theihna kawngah pawh player-ten hmasawnna tak tak an nei chho tih kan hmu a. Under-16 player ṭhenkhat pawh hun hma takah khelhna hun kan pe thei a, koh an nih chang pawhin khelmualah danglamna ropui tak an rawn thlen thei bawk a ni," tiin a sawi belh.
Goodwin-i chuan an academy thil tum ber sawi chhunzawmin, "Academy huangchhungah kan thiltih engkimah chak duhna rilru (winning mentality) tuh chu kan tum pakhat ni mah se, chu chauh chu kan dah pawimawh ber a ni ngai lo. Kan hlawhtlinna tehna ber chu infiamna sang bera hlawhtling thei tura player-te chher puitlin hi a ni. Vanneihthlak takin, tun match kan khelh chhung khan hnehna chan leh player chher puitlin kawngah hian kan hlawhtling dun thei a ni," tiin a tarlang.
United Women Under-21 te hian tun thla tawp lama Phase 2 PGA campaign ṭan leh turah pawh hetiang taka an chet ṭhatna hi chhunzawm zel an inbeisei hle a ni.
