Manchester United head coach Michael Carrick-a tactical kalphung hi khawvel football kalphung thar um kual mai mai chi a ni lo tih a chiang hle. Premier League tlarlaiah tharum thawh leh inbeihna a len zual lai hian, ani chuan ball chang tam zawk nih a, inkhel thunun theih dan a zawng tlat thung a ni.
Tun hnaiah centre-forward pangngai (traditional No. 9) an rawn lar chhoh leh mek laiin, Carrick erawh chuan tlarhma chet kual zung zung theihna (fluidity and movement) a ngai pawimawh zawk a. Tun season Premier League match an khelh tawh zawng zawngah Manchester United hian striker lem (false nine) an hmang vek a ni.
Carrick-a squad-ah hian striker tak tak pakhat chu a awm ngei a, chu chu Benjamin Sesko a ni. Mahse he Slovenian striker hian tun season-ah cup game-ah chauh bul a la ṭan a, a ngalpui (shin) hliam neih sa a rawn chhuah leh tak avangin hun engemaw chen khelmual a chhuahsan leh a ngai dawn niin a lang.
Sesko hi hliam lo pawh nise, Carrick hian bul a ṭantir dawn em tih chu inhnialna lian tak a ni; a chhan chu Carrick hian tlarhmaa inthleng tawn zung zung thei tactics a ngaina tlat a ni. Season liam ta khan Bryan Mbeumo chu a laili lamah a chhawr zeuh zeuh tawh a, tun season-ah phei chuan Matheus Cunha chu false nine atan a hmang nghet chho ta hial a ni.
Cunha hian World Cup-ah khan Brazil tan kawr nambar 9 ha mah se, striker pangngai a ni lo. Centre-back-te laka buaina siam a, penalty box chhunga hun hmang tam chi nilovin, hniam taka rawn tlan thlaa a ṭhiante nena ball in-pass kualpui chi a ni zawk.
Hetiang false nine hman hi kum eng emaw zat liam ta khan club lian tam takin an lo hman nasat tawh a ni a, mahse tun hnaiah erawh striker pangngai hlutna a rawn sang chho leh ta zawk a ni. Erling Haaland, Alexander Isak, Joao Pedro, Igor Thiago leh Viktor Gyokeres te chu Premier League-a entirna langsar tak an ni. Nottingham Forest-in Liam Delap lakluh nan £50million thleng thehchhuah an inhuam hian No. 9 pangngai man a to chhoh zia a tarlang chiang hle. Crystal Palace-ah Jean-Philippe Mateta a che ṭha em em a, Sunderland-ah Bryan Brobbey leh Leeds-ah Dominic Calvert-Lewin te pawhin striker hlutna an pholang bawk.
Sesko a inhliam takah chuan United tan a thlaktu tur an awm lo nghal der a ni. An academy huang chhungah pawh chhawr tur an nei chuang lo. Youth team lam pawhin senior team tactics zuiin false nine hmangin an khel ve tho va, rawlthar Amir Ibragimov pawhin false nine angin bul a ṭan ṭha hle. Academy player zinga striker pangngai ber Chido Obi chu kum 18 mi niin, first-team tawn hriat nei tawh mah se, tun season chhung hian Dutch club Willem II lamah loan-in a chhuak daih a, match li a khelhah minute 36 chauh a la inlan a ni.
Nipui transfer bazar chhung khan Joshua Zirkzee chhuak mah se, United hian striker thar lak luh an tum miah lo a nih kha. Mahse Sesko-a fitness hian buaina a siam chhunzawm zel a nih chuan, January transfer-ah emaw kum 2027 nipui bazar-ah emaw an ruahmanna an thlak a ngai ngei dawn niin a lang.
Delap-a man to zia aṭang hian striker pangngai lakluh a hautak tawh zia a lang chiang a. Pep Guardiola-a'n Barcelona-a false nine a lo chawilar hrep hnu khan, academy tam takin No. 9 pangngai chherchhuah an lo chawlhsan deuh a, tunah hian an hlu leh thut si a, lak tur an vang em em a ni. United hian khelmual laili lama Mbeumo emaw Cunha emaw an chhawr zui zel a nih loh chuan, transfer bazar lamah an inlenchhuah leh ngei a ṭul dawn niin a lang.
