Manchester United neitu zinga mi, billionaire Sir Jim Ratcliffe chuan UK-in harsatna a hmachhawn mek laka hma la turin Andy Burnham chu a huaisen tawk em tih a rinhlelh thu a sawi chhuak.

The Sunday Times nena an inbiaknaah, Ineos dintu Sir Jim hian Burnham chu "mi fel tak" a nih thu sawi mah se, Old Trafford-a a thlen tirha a thutlukna siam harsa tak takte nen khaikhinin, UK dinhmun siamṭha tur chuan Burnham-a'n thutlukna khauh tak leh mipui duh loh tur thil pawh a siam ngam a ngai tih a sawi a ni.

Sir Jim chuan, "Manchester United-a kan thil tih kha i thlir a nih chuan, a tirah khan club kha sum leh pai lamah dinhmun chhiaah a ding a, mipui duh loh thil pawh ni se kan hmachhawn a ngai tlat a ni," tiin a sawi. Sir Jim hian United-ah hian hnathawk 450 lai a lo ban tawh bakah, staff canteen te a lo kharsak tawh avangin sawiselna nasa tak a lo hmachhawn tawh a ni.

UK harsatna lian ber pahnih chu raltlan/immigrant lo luh tam lutuk leh sorkar ṭanpuina (benefits) la an tam lutuk hi a nih thu sawiin, "Heng thilte chingfel tur hian mi huaisen, ram economy tana ṭha tur thutlukna siam ngam kan mamawh a ni. Mahse tunah chuan chutiang ti ngam an awm lo. Engpawh nise, Andy hian hetiang ti tur hian huaisenna a nei em tih chu thla 12 lo la awm turah hian a lang chiang mai ang," tiin a sawi belh.

Kumin February thla khan, khami laia Greater Manchester Mayor ni lai Burnham-a'n Sir Jim-a'n "UK hi immigrant-te'n an hnehchhuh (colonised) tawh a ni," a lo sawi chu na takin a lo chhang let tawh a. Burnham-a'n he thil hi Manchester khawpui thiltum leh nihna kalh chiah a nih thu a lo sawi a ni. United neitu hlui Glazer chhungkua pawh kawk telin, helaia nunphung tana thawhhlawk nei miah si lova kum tam tak chhung he club aṭanga sum lo la chhuak ṭhinte chu a lo sawisel bawk.

BBC nena an inbiaknaah pawh Sir Jim hian UK lakah rinna a neih tawh loh thu leh ram chu a tlakhniam mek thu a lo sawi tawh a. Monaco-a cheng Sir Jim-a'n BBC Big Boss Interview-ah, "UK hi hmun nuam tak a lo ni ṭhin a, khawvela empire ropui ber kan nei a, indopui pahnih hnehin mi rinawm tak kan ni ṭhin. Mahse tunah chuan kan tlakhniam mek zia hmuh a hrehawm hle a ni," a ti.

He a thusawi avang hian Manchester United Muslim Supporters Club (MUMSC)-in Sir Jim lakah rinna an neih loh thu an puang zui nghal a. An thuchhuahah, "Kumin tir lamah khan Sir Jim Ratcliffe-a'n immigrant chungchanga a thusawi kha kan lo dem tawh a, ngaihdam a dil hnuah zirlai a zir tawh ngei kan beisei a ni. Mahse tun karah sorkar ṭanpuina la te leh immigrant-te bawk chu UK harsatna bulpui ber angin a rawn sawi leh ta a, hei hi kan pawm thei thlawt lo a ni," tiin an tarlang.

MUMSC-in Sir Jim-a'n ram hruaitute inrelbawl thiam loh chu hnam dangte laka lehpui a tum chu thil dik lo tak a nih thu an sawi zui bawk a ni.