Manchester United leh an captain Bruno Fernandes te inkarah contract thar ziah chungchanga inbiakna kal mek chu chinfel a la ni lova, Marcus Rashford-a hlawh zat tam tham tak avangin squad hlawh inpek dan tur bithliah (wage hierarchy) kawngah United hotute tan ngaihtuahna sen a khirh chho hle nia report a ni.

Transfer chanchinbu mi Fabrizio Romano-a thuchhuah tarlan danin, United leh Fernandes-a agent te chu contract thar chungchangah hian an la inbe reng a, mahse tun thlengin inremna puitling erawh a la awm lo a ni. He inbiakna a khaihlak chhan ber pakhat chu he Portuguese midfielder hlawh phut zat a nih bakah, contract thar hun chhung tur leh a contract-a lei chhuah theihna awm sa (release clause) chungchang a tel bawk.

Tun dinhmunah Fernandes hian Old Trafford-ah hian kum 2027 thleng daih contract a la nei a, club lamin kum 2028 thleng pawhsei theihna (option) an kawl bawk. Hei hian INEOS kutah he player chungchang thunun theihna hun pe rih mah se, an captain tana lukhawng pek dan tur chungchang erawh a la tifel thei chuang lo a ni.

Rashford-a hlawh zat tarlan dan chuan, bonus nen kar khatah £390,000 lai a la mek nia sawi a ni a. INEOS chuan United squad chhungrila hlawh inpek dan phung tichhe lo thei ang bera kalpui an duh avangin, Fernandes-a sum phut zat leh Rashford-a hlawh lo neihte chu uluk takin an thlir mekin an buk kual mek a ni. A tirah chuan United hian Fernandes hi an club-a hlawh la hnem ber atana siam an inbeisei a, mahse Rashford-a hlawh zat vanga harsatna awm thei avangin club hotute chu fimkhur taka chet an ngai ta a ni.

Fernandes-a contract-ah hian tun dinhmunah release clause €65 million (£55.1m/$73m vel) a awm sa a, United hian he clause hi paih thak emaw, a aia tam daiha tihsan emaw an duh a ni. Chuvang chuan he inremna hi kar tin hlawh chungchang mai piah lamah thil dang tam tak a innghat bawk.

Fernandes hi tun dinhmunah Old Trafford-ah hian a la hlim hle nia hriat a ni a. Mahse, team dinhmun a chhiat chhunzawm a, Champions League an tlin leh loh hlauh chuan a hmabak ngaihtuahna kawngah nghawng a neih theih tho a rinawm bawk.

Hemi rual hian United chuan nakkum nipuia contract zo tur Luke Shaw pawh a thlawna chan an duh loh avangin contract pawhsei pui tumin inbiakna neih an tum bawk a. Lisandro Martinez leh rawlthar Harry Amass te contract-a kum khat pawhsei theihna awmte pawh hman an rilruk mek bawk a ni.

Romano chuan United hian he buaina chinfel nan hian thla eng emaw zat hun an la nei tih a tarlang a. Kum 2028 thlenga pawhsei theihna an kawl hian Fernandes chu kum 2027-a a thlawna chhuah mai tur lakah club chu a humhim rih a, mahse an captain pawimawh tak hmabak titluang tura inbiakna erawh ngawrh taka an chhunzawm zel a ngai dawn a ni.