Manchester United-in entu 100,000 lenna stadium thar sak an tum thu an puan khan, he manager ropui Sir Alex Ferguson hian chu stadium thar hawnnaah chuan a la dam ve angem tih a ngaihtuah let hial a ni.
Ferguson-a memoir lehkhabu thar 'Games of My Life' tihah chuan, "Ka Siamtuin ka tana a ruahman chungchangah rilru seng reng mi ka ni lo a, thih pawh ka hlau hek lo. Chuti chung chuan thihna hian ka rilru a rawn luh leh zawk ṭhin," tiin a ziak a. "Stadium thar sak hna hi an ṭan vat ka beisei, a chhan chu sa zo tur hian kum nga a duh a nih chuan kum 90 ka hnaih tawh dawn a ni. Mahse, he hunserhah hian taksa ngeiin emaw, thlarauin emaw, kawng khat zawng talin ka tel ve dawn tih ka hria a ni," a ti bawk.
Kum 84 mi Scot hian a nun pumah hian theihna zawng zawng sengin hun a hmang ṭhin a, a lehkhabu tharah hian a tana awmze nei ber match 21 a tarlang a ni. Heng match a thlan chhuahte hi chhiartute tan chuan thil mak tak a tling maithei tih Ferguson hian a pawm a, mahse amahah chuan chhan hrang hrang vangin theihnghilh theih loh hriatrengna an ni vek thung.
He lehkhabu hi September 2018-a Old Trafford-a Wolves nen 1-1 a United an inhnehtawk ṭum aṭangin a inṭan a. Hemi ṭum hian thluaka thi chhuak (brain haemorrhage) a tawrh hnua a vawikhat nan Old Trafford-a directors' box-ah Ferguson hi a kir leh a nih kha. Damlohna a tawrh ṭum hian Ferguson-a nunna chu a derthawng hle a; amah an zai ni khan mi dang palite pawh chutiang natna avang chuan zai ve bawk mah se, Ferguson leh mi dang pakhat chauh chu an dam chhuak a ni.
Ṭawng theihna nei let turin ni li emaw ni nga emaw chhung ṭawng zirtirtu (therapist) a mamawh a, 2018 nipui pumhlum chu taksa chakna nei let turin therapy hmangin a hmang ral a ni. Old Trafford-a a kir hma kar khat la awmah inbuatsaihin amahin a kal chhin a, a enkawltu doctor leh nurse-te chu an chhungte nen match en tur hian a sawm vek a ni. Khami ni khan fan-te hnen aṭangin lawmna ropui tak a dawng a, a rilru a khawih em avangin thaw pawh a thaw ṭha hleithei lo hial a ni.
Ferguson-a dam chhuah theih chhan lian ber chu a nupui Lady Cathy Ferguson vang a ni a, tluk sual a tawh laia pheikhawk inhung tla ri a lo hriat vanga rang taka buaipui a ni. Kum 1966-a a lo neih tawh Lady Cathy hi kum thum liam ta khan kum 84 mi niin a boral a ni. 2023 FA Cup final-a City an hmachhawn ṭum khan a nupui dam loh avangin boruak a rit hle a, London-a riak lovin match zawhah Manchester-ah a haw nghal a, thla li hnuah a nupui hian a boral san ta a ni. Ferguson chuan, "Manchester United ka enkawl a ni maithei, mahse Ferguson United enkawltu ber erawh Cathy a ni. Cathy hi manager mai a ni lova, CEO, assistant manager, team doctor, kit woman leh club ambassador a ni bawk," tiin zahna a hlan a ni.
2024 FA Cup final-a City 2-1 a United-in an hneh ṭum pawh a telh bawk a, Kobbie Mainoo-a goal khung mawi zia a fak hle. He lehkhabu-a match 21 awm zingah 13 chu United match a ni a, May 1953-a United leh Rangers inkhelh a vawikhat nana United a hmuh ṭum te, Munich air disaster thlen hnu leh 1968-a Sir Matt Busby-a hnuaia European Cup an chawi ṭum te a tel a. Kum 1999 Treble lak ṭuma Champions League final tel lo mah se, semi-final-a Juventus 3-2 a an hneh ṭum erawh a telh thung a ni.
