Manchester United midfielder hlui Danny Drinkwater chuan an manager hlui ropui Sir Alex Ferguson-a'n player-te contract thar a sawipui ṭhin dan kha a lo ngaithei lo hle tih a sawichhuak.

Leicester City leh Chelsea midfielder hlui Drinkwater hi United academy-ah kum 13 chhung zet a awm a. Mahse, kum 2012-a Leicester City a zawm hma khan United first-team tan match khat mah a khel hman lo a, hemi hnu kum li lekah (2016) Leicester chu Premier League-ah a champion pui ta a nih kha.

Old Trafford a chhuahsan hma hian, football khawvela thil harsa ber pawl - United boss hlun Sir Alex Ferguson-a nena contract thar chungchang sawi dunna hun a lo hmachhawn ve hman a. Khatih lai khan Drinkwater hi reserve team-ah chauh a la khel a, a aiawha manager lo va dawr turin club captain Gary Neville chu vawi hnih ngawt a lo ngen tawh a ni.

Neville-a va biakna aṭanga a thil hmuh chu a lungawi tawk loh avangin, amah ngei chuan Ferguson-a chu a va hmachhawn ve ngam a, mahse he Scottish manager hian a lo hau hrep a, a va kal chu a inchhir leh nghal hle a ni.

The Athletic-in Sir Alex-a laka a duh loh ber thil a zawhna chhangin Drinkwater chuan, "Contract a sawipui dan kha ka lawm lo ber a, chu chauh chu a ni," tiin a sawi.

"Kum 18 mi vel ka nih lai a ni a, ka professional contract hmasa ber pawl a ni. A hlawh zat a dik tawk loh thu sawipui ka va tum a, mahse min lo khap hmak a. Keichuan, 'A pawi lo, nang chu Pathian i nih hi' ka ti ringawt a ni," a ti.

Drinkwater chuan sawi chhunzawm zelin, "Gaz (Gary Neville) khan vawi hnih lai min lo sawipui tawh a. A hma aiin a hlawh chu a lo tihsan tir tawh a - thla khatah pound sang nga (£5,000) vel a ni. Inremna ṭha zawk a va siampui hnuah pawh khan Gaz hnenah chuan, 'A la dik tawk lo a nih hi Gaz,' ka la ti fan a.

"A va kal leh a, mahse engmah a rawn thlak danglam thei tawh lo. Naupang mai ka la nih avangin ka duhâm vang nge ka hriat chak vang zawk pawh ka hre lo, han tum leh hram turin ka ngen leh a ni.

"A hlawh zat kha a dik lo hlein ka hria a, mahse Gazza (Gary Neville) pawh khan, 'Drinks, reserve football chauh i la khel a nih hi, eng nge beisei vak i tum?' min ti hial a ni.

"Chuvang chuan keimah ngei khan gaffer (Sir Alex) chu ka va hmu ta a, mahse min lo hau hrep a ni. Keichuan, 'A nih chu, a ṭha e' ka ti ringawt a. Tun hnu aṭanga thlir let hian tawn hriat ṭha tak a ni tih ka hria a, mahse khatih lai kha chuan ka zam hle a ni," tiin a sawi.

Drinkwater hian Ferguson-a'n agent-te a huat zia a hriat avangin Neville-a hi a lo va dâwtir a ni. "Sir Alex-a'n agent-te a haw em em tih ka hria a. Naupang te tan agent neih a ṭul em tih pawh ka hre lo. Kum 15 ka nihin ka agent hmasa ber ka nei a, kum hnih daih contract kan nei a.

"Mahse naupang tan chuan agent neih kha a ṭul berin ka hre lo. Kha contract a zawh hnu khan agent dang neih leh pawh ka duh tawh lo a. Chumi hun lai tak chu a ni, club-a mi zahawm tak Gary Neville-a hnenah min va sawipui tura ka ngen tak ni.

"Min thlawp tlat ti ila, keimahah hian engmah theihna langsar a la awm loh avangin a dik chiah lo maithei a, mahse a tawp bawkna erawh keimah ngeiin ka va tifel thung a ni.

"Neville khan player dang tam tak tan pawh hetiang hian a lo ti tawh ṭhin a. Club chhungah khan a chungchuang em em a, a ropui hle a ni. Ka inremna pakhatah ringawt pawh khan vawi hnih lai min va sawipui a ni," tiin a sawi bawk.