Tun kar tawp Inrinni hian Manchester United chuan Old Trafford-ah table mawngphah lama awm Tottenham Hotspur chu Premier League match-ah an mikhual dawn a. Spurs dinhmun a chhiat em avangin an manager Roberto De Zerbi lakah pressure sang hle mah se, United head coach Michael Carrick tan pawh kar hnih lo awm tur hi a hma hun hril thei khawpa pawimawh a ni ve thung.
Premier League-ah Tottenham, Leeds United leh Bournemouth te an hmachhawn dawn bakah, Champions League lamah khualmualah Atletico Madrid leh Como te an tlawh dawn bawk. Result ṭha leh ngelnghet an neih thuai loh chuan, Carrick hi tun season Premier League-a manager ban hmasak ber nih hlauhawm dinhmunah a ding thei a ni.
Chuvang chuan tun kar tawpa Tottenham laka a player chhawr tur thlanchhuah dan hi Carrick tan a pawimawh takzet a ni. Goalkeeper dinhmunah chuan Karl Darlow leh Tom Heaton te hliam vangin chhawr theih an nih loh bakah, Senne Lammens hi rintlak ber a ni tho tho va. Fulham laka an chetsual ṭuma ama lamah goal a pet luh (own goal) avangin sawisel tawk mah se, a hmaa keeper lo ni tawh Andre Onana leh Altay Bayindir te ai chuan hmasawnna lian tak a la ni tho a ni.
Tlarhnung lamah Diogo Dalot leh Luke Shaw te chu full-back atan thlan hmasak ber tur an ni a, Harry Maguire leh Lisandro Martinez te chu central defence-ah an inkawp leh rin a ni. International break laia France tana che ṭha em em Leny Yoro pawh tlarhnungah hian inrawlh thei dinhmunah ding mah se, Maguire leh Martinez-a te inkawpna hi rintlak zawk tura ngaih a ni rih.
Midfield lailiah captain Bruno Fernandes a awm dawn a, England squad aṭanga inhnukdawk Kobbie Mainoo pawh a fit a nih chuan bul ṭan tura ngaih a ni. An bula khel tur midfielder pathumna erawh a la chiang chiah lo va, Youri Tielemans leh Andrey Santos te an la nghet tawk lo va, Mason Mount chhawr nghal pawh thil hlauhawm tak a tling thei a ni. Chutih laiin kumin nipuia Brighton aṭanga an lakluh Carlos Baleba chu a vawikhat nan bul ṭantir theih dinhmunah a ding ta thung. Pre-season-a a kerek a tihhliam hnuah kar liam ta khan Lausanne-Sport nena friendly an khelhah a inlan tawh a, squad chhung tihphuisuitu tur bera ngaih a nih ang ngeiin bul ṭan theihna hunṭha a nei a ni.
Tlarhma lamah chuan mual sir tuak tuakah Marcus Rashford leh Bryan Mbeumo te Carrick-a'n a chhawr a rinawm hle. Rashford leh Shaw-a te inlungrualna a ṭha tawk tawh a, Mbeumo pawh a ni fuh chuan Premier League winger ṭha berte zinga mi a ni. Hma hruaitu atan Benjamin Sesko chhawr beisei a ni bawk.
Mahse helai tak hi buaina chu a ni ta a; international break lai khan Slovenia squad aṭangin hliam vangin Sesko hi a inhnukdawk a, Spurs lakah a inlan thei dawn em tih a la chiang lo. Ani chauh hi ngaihtuahawm a ni lo va, Mainoo leh Rashford te pawh England squad aṭangin an inhnukdawk a, Baleba pawh full training zawm ve tawh mah se bul ṭan nghal turin a inpeih tawk em tih hriat a la ni lo. Carrick hian a squad ṭha ber chu hre chiang viau mah se, hliam neite dinhmun hian a duh ang tak team a remchhuahtir thei dawn em tih chu hriat a la ni rih lo a ni.
