International match khelh chawlhkar a nih avangin Manchester United player-te chu an ram tana fehchhuakin an awm darh mek a, Michael Carrick-a naute hi chawlhkar hnih dang zet chu club inkhelah an inlan dawn rih lo a ni. Fulham laka 1-1 a an inhnehtawk hnuah United hian chawlhin, tun dinhmunah Premier League-ah 12-na dinhmun an luah mek a ni.
United senior squad aṭangin player 11 lai chu ram tana khel turin an fehchhuak a. Chung zingah chuan Portugal tana inlan tur Bruno Fernandes leh Diogo Dalot, Cameroon squad zawmtu Bryan Mbeumo bakah Belgium tana khel tur Youri Tielemans leh goalkeeper Senne Lammens te an tel a ni. Hemi bakah hian France lamin Leny Yoro an ko thar a, Netherlands pawhin Joshua Zirkzee an ko thar bawk.
Khelmual pawn lamah erawh Old Trafford boruak a la reh chuang lo a, an academy rawlthar langsar Noah Ajayi chuan club-ah hian a professional contract hmasa ber a ziak fel ta a ni. Kum 17 mi winger hi Germany khawpui Hamburg-a piang a ni a, Germany youth level aiawha khel tawh niin, Darren Fletcher-a enkawl Under-18 squad-ah Gabriel-a nen pawh an lo khel dun tawh a ni. Season liam ta khan FA Youth Cup final an luh theih nan tha a thawh hlawk hle a, tun season-ah pawh theihna a nei ṭha tih a pholang chhunzawm zel a ni.
Ajayi-a'n contract a ziah chungchangah United chuan official thuchhuah siamin, "Kan player naupang theihna ngah Noah Ajayi chuan Manchester United-ah a hmabak a hlan fel ta e. He kum 17 mi winger hian hun rei tak daih tur professional contract a ziak a ni. Season liam ta khan Darren Fletcher-a Under-18 team-ah Ajayi hi a che ṭha em em a, young Reds ten FA Youth Cup final an thlen theih nan thawhhlawk tak a ni. Noah-a'n inremna thar a ziak hi Manchester United-a mi zawng zawng kan lawm a, a hmasawn zel dan tur thlir kan nghakhlel hle a ni," tiin an puangzar a ni.
Chutih rualin, Old Trafford-ah hian an player naupang dang JJ Gabriel-a chhuah duhna thu erawh sawi a la hlawh zui reng a ni. Kar liam ta khan kum 15 mi forward Gabriel hian United nena an inremsa registration tihtawp a nih theih nan ngenna a thehlut a. Kum 16 a la tlin loh avangin professional contract emaw scholarship emaw ziah theih a la ni lova, hemi a nih avang hian registration tihtawp chauh hi club dang zawm theih nana free agent a nih theih dan awmchhun a ni thung.
United chuan Gabriel-a chhuah dilna hi an hnawlsak a, mahse October ni 6-a kum 16 a tlin hunah chuan he rawlthar hi dan anga dang thei an ni tawh dawn lo a ni. Gabriel hi a chhungte lam aṭangin Ireland leh Cyprus ram mi nihna (EU passport) a neih theih avangin, kum 16 a tlin aṭang chuan Europe khawmualpuia club dangte zawm thei dinhmunah a ding nghal dawn a ni. He rawlthar hi Spanish club lian Barcelona nen sawizawm niin, inbiakna nei turin Gabriel leh a aiawhtute hi Spain-ah an thlawk thla hial niin chanchinbu ṭhenkhat chuan an lo tarlang tawh a ni.
Mahse Barcelona sporting director Deco chuan heng thu thang hi a dik loh thu fiah takin a sawi chhuak a. Portugal Football Summit-ah Deco chuan, "He naupang chungchangah hian sawi tur engmah a awm lo. Kan club nena player-te sawizawm an ni ṭhin hi thil thleng pangngai a ni a. Player la naupang takte chungchangah pawh ngaihvenna a nasat theih em avangin transfer bazar lian tak a awm reng a ni," tiin a sawi.
Deco chuan sawi chhunzawmin, "Mahse amah anga dinhmun chiang lo laka awm player hi kan ngaihven lo hrim hrim. Eng thil chiah nge thleng mek tih pawh ka hre lova, Manchester United player a la ni reng em tih pawh ka hre lo bawk. Hetiang thilah hian kan inrawlh ve lo hrim hrim a ni. Eng emaw tih kan tum hmain thil awm dan hriatthiam hmasak phawt a ngai. Naupang leh rawlthar chungchang sawi zui hi kan buaina tur a ni lo," tiin Barcelona chu Gabriel-a transfer-ah hian an inrawlh loh thu a nemnghet a ni.
