Manchester United Women star Celin Bizet chuan nau a neih hnuah khelmual chawlhsan rihin, tun hnaiah training a rawn zawm leh ta.

He Norwegian winger hian club media hnenah inkawmna neihpuia, tun season chhung hian eng ang boruak nge a beisei tih leh a rilru puthmang a sawichhuak a ni.

A naute nen an dinhmun eng nge a an tih an zawhna chu chhangin, "Thil engkim a kal tluang em em vek a ni. Helaia ka kir leh thei hi a nuam takzet a, a ngai reng angin a lang na a, mahse a danglam tawh hle thung a ni lawm ni?" tiin a sawi.

Bizet-i chuan sawi zawmin, "Team thiante nena inhmuhkhawm leh a, nilenga training neih a, thiante bula inkawm theihna hun neih chu a nuam hle mai. In lama naute awm chunga haw leh chu boruak danglam tak a ni a, mahse a nuam danglam em em a ni," a ti bawk.

Thla riat chhung zet team training a neihpui tawh loh hnuah a vawikhat nan team session-a a tel leh thei chu a rilru khawih tak thil a nih thu a sawi a. Team nena an training hma hian kar ruk aṭanga kar sarih vel chu mimalin inbuatsaihna (pre-season) a lo nei hmasa tawh a ni.

"Mi inkawmhlimpui nuam ti mi ka ni a, hmeichhe ho bula ka awm hian tha thar leh chakna nasa tak ka nei ṭhin. Chuvang chuan staff te leh team-te nena training ṭha tak kan nei thei chu a nuam takzet a ni," tiin a sawi belh.

Manager thar Eva Olid-i chungchang an zawh pawhin he winger hian a fak hle a. Olid-i'n ball chang tam leh attacking football khelh a duhzawng chu a khelh duh dan chiah a nih thu a tarlang.

Bizet-i chuan, "Khelh a duh dan phung hi ka ngaina takzet a ni. Hei hi keima khelh dan duh tak pawh a ni reng a. Ball chan tam a, tlarhnung venhim pawh a ngai ngei mai, mahse ball thunun tam leh attacking football khelh lamah rilru pek zawk hi a duhdan a ni," a ti.

Catalan manager Olid-i mize chungchang sawiin, ani chu mi hlim thei tak leh boruak zangkhai tak kengtel thei mi a nih thu a sawi bawk.

Khelmuala a luh leh theih hun tur chungchang a sawinaah, "Ni danglam bik leh chhinchhiah tlak tak a ni ngei ang. Rilru khawih tak a nih ka ring a, mahse khelmuala ka lut leh thei tur hi a lawmawmin a phurawm takzet ang. Kum riat mi ka nih aṭanga ka lo tih tawh ṭhin kha a ni a. Chuan, Gio-i a lo awm ve theih dawn phei chuan, ka nghakhlel tawh hle a ni," a ti.

Manager Olid-i chuan Bizet-i hian beisei aia rangin hma a sawn mek tih a sawi a, chuvang chuan hun rei lote hnuah khelmualah kan hmuh leh thuai theih a beiseiawm hle.

Manchester United Women hian naktuk chawhnu dar 1:00 BST-ah league match-ah West Ham United an hmachhawn dawn a ni.