Manchester United academy chhuak striker D’Mani Mellor chuan Yemen national team tan a vawikhat nan ram aiawhin international debut a siam ta a, a career-a thil chhinchhiah tlak tak a thlen theih avangin a lawm hle tih a sawichhuak.
Kum 8 mi lek a nihin Manchester United academy a zawm a, youth rank hrang hrang paltlang chho zelin kum 2019 khan FC Astana lakah first-team debut a lo siam tawh a ni. Kum 2017-18 season khan Kieran McKenna-a enkawlna hnuaiah U18 Premier League North title la tu United team-ah khan player pawimawh tak a lo ni tawh bawk. Kum 2022-a Old Trafford a chhuahsan hnuah England-a lower-league club hrang hrangah a khel kual a, tunah hian National League club Forest Green Rovers tan a khel mek a, helai hmuna an head coach hi United academy player hlui tho Robbie Savage a ni nghe nghe.
Kar kalta chhung khan kum 26-na piancham lawmtu Mellor hian a vawikhatna atan Yemen national team aṭangin kohna a dawng a, a tana chanchin lawmawm tak a ni. 27th Gulf Cup inelna match hmasa berah Yemen hian United Arab Emirates (UAE) an hmachhawn a, 4-0 ngawta an tlawm avangin Yemen tan chuan theihnghilh thuai duhthawh match ni mah se, Mellor-a tan erawh a career-a bung thar pawimawh tak a ni thung.
He inkhelah hian Mellor chu half-time-ah substitute-in a rawn lut a. Minute 45 chhung a inlanah hian ball vawi 14 a tawk hman a, UAE-in khelmual an thunun hneh em avangin tlarhnung puih ngaia awmin tackle vawi thum lai a nei hman a ni. Hetiang dinhmunah hian an duhthusam ang result hmu lo mah se, international player a nih theihna kawng a hawng fel ta a, an hmachhawn leh tur Qatar leh Bahrain laka theihna phochhuah zui zel chu a thil tum lian ber a ni tawh ang.
Yemen tana a debut match khelh zawh hnu hian, Mellor chuan Instagram lamah inkhelh thlalak tarlangin a rilru a phawrhchhuak a. Mellor chuan, "Ka ram tan international debut ka siam ta. Result lamah kan duhthusam thleng lo mah se, ka damchhunga ka theihnghilh tawh loh tur leh ka hlut reng tawh tur hun ropui tak a ni. A tir aṭanga a tawp thlengin kan fan-te ṭawiawmna a ropui em em a ni. Keimahnia rinna in nghah avangin ka lawm e. Thil tam tak kan inzirchhuak ang a, insiamṭhain chak zawk leh phur zawkina kan lo kir leh ngei ang," tiin a ziak a ni.
Tun season chhungin Forest Green Rovers tan Mellor hian inelna hrang hrangah match 18 a khelh aṭangin goal thum a khung tawh a. Ram tana international match khel tawh a nihna chu phurpui zelin club lamah hian tha thar nen a kir leh dawn a ni.
