Manchester United Women chuan tun hnai match-ah hmalam an pan chho mek a, season bul an ṭan dan duhawm lo tak chu theihnghilhin an insiamrem chho mek a ni. Season an ṭan tirh lamah London City Lionesses leh Chelsea lakah tlawmin harsa taka hun an hman hnuah, Inrinni liam ta khan Emirates Stadium-ah chak zawk nih theihna hunṭha nei reng chungin Arsenal nen 1-1 in an inhnehtawk a nih kha. Chu mai bakah, Players' Cup inkhelah Sheffield United chu 10-1 ngawta sawpin, head coach thar Eva Olid-a hnuaiah an hnehna hmasaber an lo chang tawh bawk a ni.

Naktuk hian league inkhelah United hian West Ham United chu an hmachhawn dawn a, he inkhelh pawimawh tak hma hian Spaniard coach Olid chuan chanchinbumite hmaah a player-te dinhmun a sawifiah a ni. Nau a neih hnu lawka training rawn zawm leh thei Celin Bizet-i fitness dinhmun chu a lawmawm chhoh thu a tarlang hmasa ber a ni.

Bizet-i chungchang sawiin Olid chuan, "Celin-i dinhmun hi chu a danglam deuh a, a chhan chu a tirah chuan performance department lamin a bik takin ruahmanna an lo siampui a ni," a ti a. Sawi zawmin, "Mahse amah hi a inngai ṭha em em a. Training pawh ṭha takin a nei mek a, a hma thei ang berin a rawn kir leh thuai ka beisei a ni," tiin a sawi.

Head coach chuan sawi chhunzawm zelin, "Ruahmanna pangngaiah chuan, naute a nei zo hlim chauh a nih avangin hun thawl zawk pek an tum a. Mahse a theihna a rawn vawrh chhuak chak em em a, kan beisei aia hmain a rawn inlan theih ngei a rinawm ta a ni. Engtik chiahah nge a rawn khelh theih ang tih hi a hun chiah la hre lo mah ila, a rei tawh lo hle dawn tih erawh a chiang a ni," tiin a sawi bawk.

Bizet-i chanchin bakah hian Olid chuan a squad-a player dangte dinhmun pawh a tarlang nghal bawk a. West Ham an hmachhawn hmaa an squad dinhmun sawiin, "Naktuk hian squad pumhuapin thil eng emaw zat enfiah leh tur kan la nei dawn a. Mahse tun dinhmunah chuan Ellen (Wangerheim) chu a rawn kir tawh dawn a ni. Midang erawh an dinhmun a la ngai reng a, Jayde [Riviere] leh Emma [Watson] te erawh chuan an rawn kir leh hmain hun tlem an la mamawh rih dawn a ni," a ti.

Manchester United Women leh West Ham United te inhmachhawnna hi naktuk chawhnu dar 1:00 BST-ah Progress with Unity Stadium-ah an khel ang.