Manchester United striker hlui Teddy Sheringham chuan kum 1999, 2000 leh 2001 te khan Red Devils tan Premier League title pathum ngawt a lo chawi tawh a. Premier League-in Manchester City laka dan bawhchhiatna an hmuhchhuah avanga an title lak tawhte hlihsak a nih theihna dinhmun chungchang chu football khawvelin an ngaihven mek a ni.
Manchester City hian financial rules bawhchhiatna 115 ngawt an hmachhawn mek a, hremna lian tak an tawk maithei a ni. Heng hremna zingah hian an lo lak tawh Premier League title-te hlihsak (voided) sak hi a sulhnu hmasaber a ni thei a. A dawt lehah chuan heng title-te hi a pahnihna luahtute hnena sem nawnleh a nih pawhin United tan 2012 leh 2018 season-a title-te hi dawn theihna hunṭha a awm ta thut mai thei a ni.
Mahse, Treble hero Sheringham chuan United In Focus / Hajper tana a inbiaknaah, hetianga kum tam tak a liam hnua medal rawn pek a nih pawhin a tan engmah awmze neia a hriat loh tur thu a sawi ta hmiah mai.
Sheringham chuan, "Kum tam tak a liam hnua winner's medal han dawn leh hnuhnawh maw? Kha chu awmzia a nei tawh lo hrim hrim. Ka tan phei chuan engmah a ni tawh lo a ni. Football hi chu a hun taka thil thleng leh tun dinhmuna a nihna tak kha a ni mai. Khatih hun lai khan eng emaw dik lo a awm tih kan hre sa pawh a ni thei, chutianga sum tam tak senga player ṭha ber berte hlawh tam tak pe a an lak luh kha kan hriatpui pawh a ni maithei. Mahse footballer kan nihna angin chutiang chuan engmah a thlak danglam chuang lo.
"'Enteh, kumin hian title i la zo ta lo a, hei le i medal tur' tiin min rawn pe dawn em ni? Hnai lo ve, ka pawm thei lo ang," tiin thupapui a sawi chhuak a ni.
Sheringham bakah hian United legend leh all-time top scorer Wayne Rooney pawhin chutianga medal rawn pek a nih pawhin pawm a hrehawm a tih tur thu a lo sawi tawh a. Rooney chuan, "A dik tak chuan Premier League medal dang rawn pek pawh ni ila ka pawm nuam duh vak lo ang, a chhan chu mual chhungah title chawi tur khawpin kha season khan kan thawk ṭha tawk lo hrim hrim a ni," tiin a lo tarlang tawh bawk.
Hemi chungchangah hian Manchester United manager hlui Jose Mourinho pawhin 2012 leh 2018-a pahnihna an nih khan an phu tawk lo a nih thu a lo sawi tawh bawk a ni. Chutih laiin David de Gea leh Nemanja Matic te erawh chuan thawhhlawkna lantirtu medal hi dawn an duh thu an lo tarlang thung. A bikin Matic tan phei chuan United-ah Premier League nomawi a chawi ngai loh avangin, hetianga pe tura thutlukna a awm a nih chuan a career tan hriatrengna hlu tak a ni dawn a ni.
Sheringham leh Rooney te tan chuan medal lo ngah tawh chhia an nih avanga hnawl awlsam a nih laiin, United captain hlui Roy Keane erawh chuan City player-te laka ngaihdan hran hlak vawrh chhuakin, "Kei chu tunah hian City player ni ta ila, ka winner's medal zawng zawng hi hnawmhne bawmah ka paih vek ang," tiin insawhchak takin a lo sawi ve thung a ni.
