Cristiano Ronaldo-a'n mimal duhamna avanga Portugal national team squad a chhuahsan hnuah, Manchester United-in kum 2022-a an lo tawn tawh ang chiah boruak kha ram team hian an tawng ve leh ta a ni.

Ronaldo-a'n team a chhuahsan tak avang hian, hliam avanga international match hmasa ber khel thei lo Bruno Fernandes-a darah phurrit a innghat lian hle a. Mahse he Manchester United captain hian a tih ṭhin pangngai angin a theihna sang ber rawn pholangin, Rasmus Hojlund-a khelhna Denmark laka 4-2 a an hnehna match-ah khan assist vawi hnih a nei a ni. United defender Diogo Dalot pawhin Portugal goal li-na tur a siamsak ve bawk.

Portugal ram chhung chanchinbute chuan Fernandes-a chet dan chu an fak hle a, ani hi UEFA Man of the Match atan thlan a ni hial reng a ni. Denmark laka a khelh chhung hian Fernandes hian assist 2 a neih bakah cross ṭha vawi 2, big chance 3, long ball vawi 3, chance vawi 5 a siam a, final third-ah pass 7 zet a pe chhuak bawk a; hei hi tun season-a match khata assist vawi hnih a neih vawikhatna a ni.

Mais Futebol chanchinbu chuan he team hmasawnna fak chungin heti hian an ziak a: "Ronaldo chhuah hnua an match hmasa berah, Portugal chuan theihna ropui tak pholangin, he star player awm lova an khawsak theih zia an tarlang chiang hle a ni. Bruno Fernandes, Vitinha leh Gonçalo Ramos te chuan khelmualah thil mak an rawn thehchhuak a ni," tiin.

Chutiang bawkin Portugal media dang GoalPoint pawhin Fernandes hi 7.8 rating pein Portugal player ṭha berah an thlang a, "Goncalo Ramos leh Bruno Fernandes te an chet ṭhat em avangin national team tan hian team anga inpumkhatna ṭha tak a ni," tiin an tarlang bawk.

He hnehna hi nipui laia Roberto Martinez-a thlaktu coach Jorge Jesus tan chuan chhawkna lian tak a ni a. Portugal a enkawl aṭanga match thum chiah a la hmachhawn laiin, kum 41 mi Ronaldo-a buaina chinfel kawngah a hmaa coach aiin huaisenna a lantir a ni. Jesus hian Ronaldo chu squad player satliah anga insiamrem turin a beisei a, mahse he forward ropui hian chu dinhmun chu a duh loh avangin squad a chhuahsan ta a ni.

Record kaltlanga a press conference-ah Jesus chuan, "Team hian ṭangho takin an thiltihah rinna an nghat a ni. Ka tan chuan hei hi kan la khelh ṭhat ber ṭum a ni a, training lama hun tam zawk kan neih theih tak vang a ni. Positional attack lamah hma kan sawn a, Goncalo Ramos-a goal khung pawh kha positional attack goal ṭha tak a ni," tiin a sawi.

Fernandes hian Ramos-a goal khung tur hi fing takin a pe a, AC Milan striker hian one-on-one a hmuh chu goal-ah a chantir zui ta a ni. Manager-in a chungah rinna a nghah zia tilangin Bruno hi captain armband hrentir a ni bawk a. Portugal hian he international break chhung hian match khat khelh tur an la nei a, Pathianni hian Denmark bawk hi an hmachhawn leh dawn a ni.