UEFA Nations League inelnaah Netherlands chuan Greece chu 2-2 in an inhnehtawkpui a, he inkhelah hian Manchester United forward Joshua Zirkzee chu kum 2024 hnua a vawikhat nan Netherlands tan bench aṭangin a rawn inlan leh ta a ni.

Greece nena an inhmachhawn ṭum hian mualneitu lam Greece chuan first-half-ah hma hruaiin, chawlhlawk (half-time) a nih meuh chuan 2-0 ngawtin hma an lo hruai hman a. Netherlands coach Xavi chuan second-half ṭan tirah player thlak thawkhatin mi pathum a rawn luhtir nghal a, hemi hnu hian Virgil van Dijk chuan Dutch ho tan goal khat a rawn thun ve ta a ni.

Hemi hnu minute 70-naah Zirkzee hi khelmualah luhtir a ni a, Serbia an hneh ṭuma goal hnih khungtu striker Mexx Meerdink-a hmun a rawn luah a ni. Hun tawp dawn hnaih minute 89-naah Tijjani Reijnders chuan Netherlands tan goal pawimawh tak khungin 2-2 in an inhnehtawk ta a, hei hian coach thar Xavi-a hnuaia an la tlawm loh zui zelna record (vawi khat chak, vawi hnih draw) chu a humhim bawk a ni.

Minute 20 chhung khelmuala hun a hman chhung hian Zirkzee hian theihna ṭha tak a pholang a, ball vawi 13 khawihin goal zawnah vawikhat a pet a, box chhungah ke hnunglam (backheel) hmanga fing taka petin chance ṭha tak a siamsak bawk a ni.

He inkhel hi October 2024 hnua Netherlands tana Zirkzee-a inlan leh hmasak ber a ni a. United lama a inkhelh tam tawk loh avangin coach hlui Ronald Koeman-a hnuaiah khan hmun a chang meuh lo a nih kha. Tun ṭumah hian striker Brian Brobbey-a'n hliam a tawrh tak avangin koh luh a ni leh ta chauh a ni.

Manchester United lama game a khelh tlem ngaihtuah chuan ram tana a rawn inlan leh thei hi Zirkzee tan thil lawmawm leh tawnhriat pawimawh tak a tling a, Dutch tualchhung chanchinbute pawhin an lo lawm hle a ni. Voetbal Primeur chuan bench aṭanga lut ten danglamna lian tak an thlen thu an tarlang hial a ni.

Coach Xavi chuan inkhelh zawhah, "Second half-a kan chet dan kha first half-a kan thil tawn laka chhanna ṭha tak a ni a, ka hlim takzet a ni. Khelh kan duh dan phung tak a ni a, kan rilru puthmang a ṭha zawk a, phurna sang zawk nen kan khel a ni," tiin a sawi.

Netherlands hian tun international break chhung hian Serbia nen match khat khelh tur an la nei a, Zirkzee pawh hi bul ṭantu zingah a inlan ve theih beisei a ni.