Manchester United manager ropui Sir Alex Ferguson chuan kum 2018-a brain surgery (thluak zai) a neih hnu lawka ṭawng thei lova a awm lai chanchin ṭihbaiawm tak leh, Old Trafford-a a kir leh hmasak ber ṭuma a rilru dinhmunte a sawichhuak.

Kum 84 mi Ferguson hian kum 2018 May thla khan brain haemorrhage (thluaka thi tling) a lo tawk tawh a. Zai a nih hnu thla li-naah Wolves-te nena an inkhel thlir turin Old Trafford-ah a kir leh a, mahse khatih lai khan United ṭantute'n engtin nge an lo dawnawn ang tih a hriat loh avangin a huphurh hle a ni.

BBC Breakfast-in an kawmnaah Ferguson-a'n, "Ka thla a muang hle tih sawi thei ila ka ti khawp mai, mahse ka phili ru hle a ni," tiin a huphurh zia a sawichhuak. Mahse, a lo huphurh ang ngawt chu a ni lo thung.

Ferguson-a leh a nupui boral ta Cathy-i te'n stadium-a an ṭhutna hmun an pan lai khan, mual chhung kil li tin aṭangin mipuite chuan ding chungin zahna chibai (standing ovation) an lo hlan a. Ferguson-a'n, "Ka nupui kha ka kiangah a awm a, a ṭap lo chauh a ni. Kan ṭhut thlak hnu khan ka nupui chuan 'a ropui takzet a ni' tiin a sawi," tiin a sawi.

United enkawltu hlui hi he thil a thlen hma kum nga khan a lo chawl (retire) tawh a, brain haemorrhage a tawh lai hian kum 76 mi a ni. A hriselna chungchang zawhna chhangin, "Hliam tenau neuh neuh awm mah se, ka ṭha hle a ni," tiin a sawi.

Ferguson-a hian lehkhabu thar 'Games of My Life' tih chu a tichhuak ṭep a, he lehkhabuah hian a career thlaktu football match 21 chanchinte a tarlang a ni. Glasgow-a hnathawh ngai chhungkua aṭanga a seilen dan aṭanga Old Trafford dugout a thlen thlengin, a player career leh manager career-a thil thlengte a tarlang a ni.

Mahse, brain haemorrhage a tawh hnuah ṭawng thei lova a awm avangin, tun thlenga heng match chanchinte a la sawi thei hi Ferguson-a chuan lawmawm a tih thu a sawi. Kum 2018-a thil thleng kha thlirlêtin, "Ka aw ka hloh a, ka ṭawng thei lo hrim hrim a ni. Kha kha hun ṭihbaiawm tak a ni. Ka tute'n min rawn tlawh ṭum pawh khan ka ṭawng thei lo tih ka la hre reng," tiin a sawi.

"Hemi hnu hian therapist (ṭawng zirna lama puitu) an rawn hruai a, ani chuan sava hming te, ramsa hming te leh luipui hming te min ziahtir ṭhin a. Chutiang kawng hmang chuan ka aw a rawn chhuak leh thei ta a ni," tiin a sawi zui bawk.