Manchester United Women chuan assistant head coach thar atan Jose Herrera an ruat fel ta tih thuchhuah nemnghet hmangin an puang.
Kum 36 mi Spanish coach Herrera hian head coach Eva Olid-i thlawp turin Gavin Beith leh Dan Bale te a rawn zawm dawn a ni. He appointment avang hian kum 2025-a ruat lo ni tawh Scott Rogers chuan a assistant manager hna hi a chhuahsan dawn ta a ni.
Manchester United Women hi tun hnaiah an che ṭha chho hle a. Eva Olid-i'n manager hna a chelh ṭan tirhin pre-season match-ah chak nei miah lovin an buai a, season inṭan tirh match hnihah pawh London City Lionesses leh Chelsea te an hneh lo a ni. Mahse, Arsenal nen ṭha taka an inhnehtawk hnuah match zawnin vawi thum an chak chho ta a, Sheffield United chu 10-1 ngawta an sawp bakah, an match hnuhnung ber Players' Cup-ah Durham chu 5-1 ngawtin an hneh leh a ni.
United-in assistant manager atan an lakluh Herrera hi talent nei ṭha leh coach naupang tak a ni a, kum 16 a nih aṭanga coaching hna thawh ṭanin UEFA Pro Licence a nei a ni. Kum 2019 khan Málaga CF Femenino head coach hna a chelh a, kum 2020 khan Granada-ah a insawn a ni.
Hemi hnu hian UD Tenerife-ah kum 2024 thleng khan season thum chhung hun a hmang a, a tirah assistant ni mah se kum 2023 khan head coach atan hlan kai a ni. 2024-2025 season-ah khan ram pawn lamah hma sawnin Saudi club Al-Hilal Women's team head coach hna a chelh zui bawk.
Kumin January thla khan Herrera hian Atletico Madrid Women manager hna a chelh a, an team hi La Copa de la Reina final thleng puiin, final-ah FC Barcelona lakah 1-3-in an tlawm a ni. Season liam ta Champions League last 16-ah khan a club enkawl Atletico Madrid hi Manchester United lakah aggregate-ah 0-5-in an lo tlawm tawh bawk a ni.
