Bayern Munich midfielder Aleksandar Pavlovic chu Manchester United chuan lakluh an ngaihtuah mek niin chanchinbu ṭhenkhat chuan an tarlang.
Bayern academy aṭanga rawn inzir chhuak Pavlovic hi head coach Vincent Kompany-a hnuaiah first-team-ah a inlan ngun hle a. Tlarhnung venhim kawnga a thiamna leh hmun thuk zawk aṭanga inkhelh kalphung thunun thei tura a theihna sang tak avangin mi hriat a hlawh chho hle a ni.
Kum 22 mi German midfielder hmasawnna leh a khelh ṭhat chhoh dan hian Europe khawmualpuia club liante mit a la hle a. Fussball News tarlan danin, Manchester United bakah Manchester City, Real Madrid leh Paris Saint-Germain te pawhin Aleksandar Pavlovic hi uluk takin an thlithlai reng a ni. United lamin he midfielder lakluh hi "ngun takin ngaihtuah" mek mah se, City erawh chuan inbiakna ṭanphak lam kalpuiin hma an la hman tawh zawk nia sawi a ni a, he German rawlthar man atan hian €100 million dawn thehchhuah pawh an inhuam hial nia tarlan a ni bawk.
Club hrang hrangin an ngaihven chung hian, club leh club inkarah inbiakna puitling erawh a la awm lo thung. Bayern Munich chuan he rawlthar theihna ngah tak hi chhuahtir an tum lo bur a, dawrna engpawh chhan let an tum loh thu an tichiang hle. Pavlovic hian Allianz Arena-ah hian kum 2029 thleng daih contract a la neih avangin Bundesliga club lian dinhmun hi a nghet hle bawk a ni.
Manchester United-in kumin nipui bazar chhung khan midfielder pathum ngawt an lo lak tawh avangin, Pavlovic an ngaihven leh nia thuthang awm hi mi tam tak chuan mak an ti mai thei. Amaherawhchu, The Sun chanchinbu tarlan danin, United thuneitute chuan kumin nipui transfer window-ah khan an duh ang thalin thil an ti thei lo tih chhungril lamah an pawm a. Club thudawnna chuan Youri Tielemans leh Andrey Santos te chu an player lak luh tum zingah "a hnuai hnung pawl" an nih thu an sawi chhuak bawk a ni.
United hian tlar laili thawmṭhat nana an lak luh tum ber chu Elliot Anderson leh Mateus Fernandes te an ni a, mahse an target hmasate an chan tak vek avangin Santos leh Tielemans te hi an la ta zawk a ni. Old Trafford-ah heng an player lak tharte hian beisei an la phak chiah lo nia ngaih a ni a, boruak a inthlak danglam a nih loh chuan INEOS chuan nakkum lamah midfielder dang an melh leh a ngai mai thei a ni.
Chutih rualin, he chanchin thehdarhtu thudawn hi a rintlak tawk loh nia ngaih a nih bakah, INEOS hian tun dinhmunah chuan midfielder dang lak belh vut vut aia nakkum lama an tlarhnung leh tlarhma thuamṭhat hmasak an ngaih pawimawh zawk a rinawm hle a ni.
