Carlos Baleba chuan Tottenham hmachhawn ṭumin Manchester United tana a debut match a khel a. Old Trafford-a 1-1 a an inhnehtawk ṭum hian, goalkeeper Senne Lammens chuan second-half-a rawn lut player substitute-te chu Reds tana tha thar rawn thlentu an nih thu sawiin a fak hle.

Lammens chuan heng inthlakthlengnate hian United chu hmasawnna a thlen tih sawiin, Michael Carrick-a naute'n chawlhlawk hnu lama mual an thunun theih nan Baleba chu khelmuala an luhtir zinga mi a nih thu a sawi bawk. He Belgian goalkeeper hian Manchester Evening News hnenah, "A tawp lamah khan phurna thar leh tha thar (fresh legs) kha kan mamawh a ni," tiin a sawi.

Bryan Mbeumo-a'n United tan hmahruaina goal a khung hnuah, hun pek belh (stoppage time)-ah Dominic Solanke chuan Spurs tan an siphurh a rawn sut a. Hun tawp dawna goal lut hian United chu chakna a khak ta a ni. Chutih rualin Baleba-a inlan hmasak ber erawh chuan tlaia an beidawnna karah beiseina thar a rawn thlen thung a ni.

Second half-ah Youri Tielemans thlakin Baleba hi a rawn lut a. The Peoples Person tarlan danin, he Cameroon midfielder hian ball chhuhsakin, midang pass kualin, chance a siamsak bakah khelmual laili thunun nan a thawhhlawk hle. Chawlhlawk hma khan United chu an talbuai hman deuh a, ball an chan lai leh an chan loh laia an insiamṭhat a ngaih thu Lammens pawhin a pawm a ni. Carrick chuan half-time-ah tactics thlakin, minute 60-na bawr velah Baleba, Diogo Dalot leh Joshua Zirkzee te a rawn luhtir ta a ni.

Minute 73-naah Mbeumo chuan United hmahruaina goal khung mah se, Solanke-a'n hun pek belha a tauh luh avangin mualneitu United chuan point khat chauh an hlawhchhuak ta hram a ni. Baleba-a chet ṭhatna hian mualneitute mamawh ang result puitling a thlen zo ta lo thung.

Lammens-a thusawi hi Baleba chauh fakna ni lovin substitute-te zawng zawng thawhhlawkna a ni a. Training-a an lo hmuh ṭhin ang bawk kha khelmualah an rawn phawrh a ni a, season tluanin squad pum an ṭanrual a ngaih dawn thu a sawi. Lammens chuan, "Squad chhah ṭha tak kan nei tih kan hria. Chuvangin chung mite chu tun season-ah an rawn inphawrh chhuah ve a ngai dawn a, vawiina an rawn ti thei kha ka lawm hle a ni," a ti.

He midfielder hian inhnehtawk mah se United tana a inlan hmasak ber chu a mumang a panna anga a ngaih thu a sawi. Baleba-a debut hian match tam tak hmachhawn tur Carrick-a tan midfield-ah thlan theih dang a pe ta a ni.

United hian Thawhlehni hian Champions League match khel turin Atletico Madrid an lenchilh dawn a. Hun a tlem tawh em avangin Spurs laka point an hloh chu ngaihtuah zui hman an ni tawh lo va, Baleba-a rawn inlan hian Carrick-a tan match leh atana squad siamna kawngah rilru a thlaktir thei dawn a ni. Lammens chuan, "Chu rilru chu kan neih a ngai a ni. Thil ṭha tam tak kan ti tih kan hria a, chu chu la chhunzawmin kan tihsual aṭangin kan inzir tur a ni," tiin a sawi a. Madrid-a an zinna tur chu an fiahna zui nghal tur a ni dawn a ni.