Real Madrid chuan Manchester United academy forward JJ Gabriel lakluh an inbeisei hle nia report a nih laiin, kum 16 mi rawlthar hian a hma hun tur thutlukna a la siam lova, inremna engmah a la nemnghet bawk lo.
A hmabak a la chian loh avangin Manchester United chuan he rawlthar theihna ngah tak hi Old Trafford-a chelh zui nan theih tawp an chhuah mek a ni. Gabriel hian Manchester United chhuahsan dilna lo thehlut tawh mah se, hei hi a chhuak fel tawh tihna a ni lo.
Diario AS via Instagram-a José Félix Díaz-a report tarlan danin, Real Madrid chuan Gabriel-a signature an dawng thei ngei ang tih an ring tlat a, a thutlukna hnuhnung ber an nghak mek a ni. Report-in a tarlan danin Spanish club lam hian he rawlthar hi an hnaih chho viau nia ngaih a ni a, mahse player leh United te nen inremna an la nei lo thung.
Barcelona, Bayern Munich leh Paris Saint-Germain te pawhin he thil thleng mek hi ngun takin an thlitlai reng a ni. Real Madrid hi hmangaihtu leh beiseina sang ber nei anga tarlan ni mah se, club dang tan pawh inbiakna neih theihna kawng a la inluang huau reng a ni.
United senior team tana debut siam hnai tawh tura ngaih Gabriel hian, a registration tihtawp anih nan ngenna a lo thehlut tawh a ni. The Guardian report danin, United chuan a laka an thuneihna humhim nan official taka scholarship contract offer an chhawpchhuah sak ta a ni.
He scholarship offer hi United tan inbiakna neihnaah a pawimawh hle. Contract hi chhawpchhuahsakar lo nise chuan, Gabriel hi January thlaah Premier League club dangte hnenah a thlawnin a chhuak thei dawn a ni. Mahse offer a awm tak avangin, Premier League club eng pawhin an lalut duh a nih chuan United nen a man atan inbiakna an neih a ngai tawh ang a, an inrem thei lo a nih chuan tribunal hmangin zangnadawmna (compensation) chhut chhuah a ngai dawn a ni.
Chutih rualin Gabriel hi Europe khawmualpui lama club lian te zawm mial a duh zawk nia sawi a ni a, chutiang a nih chuan ram chhung club danga a insawn aiin United-in compensation an hmuh tur zat pawh a tlem daih dawn a ni. Scholarship offer leh ram chhung leh pawn club ten an lakluh dan inthlauhna hian United tana he rawlthar chelh zui chu a tipawp khirh chho hle.
Gabriel hi tun season tawp thleng United nena contract la nei a ni a, engtikah nge Madrid pan a tum tih erawh a la chiang lo. Real Madrid zawm a duh hmain Gabriel-a aiawhtute hian Old Trafford-ah first-team match khelh phawt an lo duh nia tarlan a ni a, hei hi Real Madrid-in thutlukna an nghah meka thil pawimawh pakhat a ni bawk.
