Manchester United player hlui Jesse Lingard leh Memphis Depay te chuan Netherlands midfield legend Clarence Seedorf-a hruaina hnuaiah Brazilian club Corinthians-ah hun thar an hmang dawn ta.
Seedorf-a'n Corinthians head coach hna hi a zawm fel ta a, kum 2027 tawp thleng daih tur contract a ziak a ni.
Kum 2019-a Cameroon national team a enkawl hnua coach hna a zawm leh hmasak ber a ni a. Tun dinhmunah Corinthians hi Brazilian top flight-ah 16-naah an awm mek a, relegation zone chung chiahah awmin match riat khelh tur an la nei a ni.
Seedorf hian a zawnin match sarih ngawt an tlawm avanga chawlhtir tak, Brazil interim coach hlui Fernando Diniz-a hmunruak a rawn luah a ni.
Seedorf hi a hmain AC Milan, Shenzhen FC, Deportivo La Coruña leh Cameroon national team-te pawh lo enkawl tawh a ni.
Corinthians a zawm chungchangah Seedorf chuan, "He chona pawm hi ka tan inchawimawhna lian tak a nih rualin mawhphurhna ropui tak a ni bawk. Helaiah hian ka theihna zawng zawng hlan tur leh, ball tin atan, minute tin leh hlawhtlinna tin atana ṭang fan fan tur team din turin ka lo kal a ni," tiin a sawi.
He hna a chelh hma ni tlem teah khan Seedorf hi Manchester United training centre Carrington-ah a va zin a, rawlthar Kobbie Mainoo nen tihtakzetin an inbe hman a ni.
A khelh dan phung inang tak avangin Mainoo hi Seedorf nen an khaikhin fo ṭhin a. Inbiakna an neihah hian Mainoo-a suangtuahna leh thiltumte an sawi dun a, United midfielder hian Ruben Amorim-a hnuaia a thil hmachhawn harsatna ṭhenkhatte pawh a sawichhuak tel a ni.
Corinthians-ah hian Seedorf hian Man United player hlui pahnih Depay leh Lingard te a enkawl dawn a ni.
Depay hian Atletico Madrid a chhuahsan hnuin September 2024 khan free agent-in Corinthians hi a zawm a. Kumin nipui chhung khan inremlohna tlem avangin chhuak ṭep mah se, a tawpah chuan he club-ah hian a cham zui ta zawk a ni.
Jesse Lingard erawh chuan kum 2025 tawpa Korean club FC Seoul a chhuahsan hnuin, kumin March thla khan free agent-in Corinthians hi a zawm ve thung a. American club (MLS) hrang hrangin an ngaihven hle chungin Brazil-a khelh hi a thlang ta zawk a ni.
