Manchester United chuan an first-team buaina neih mek bakah, an academy-a rangkachak anga an chhal JJ Gabriel-a hmabak chungchangah buaina lian tak an tawk mek.
Tun season chhung hian JJ Gabriel hi rawn langsar chho tura beisei a nih laiin, thil erawh a thleng danglam ta thung a ni. Kum 16 mi forward hian Old Trafford-a a registration tihtawp a, club chhuahsan a dil ta thut mai a, hei hian United hotute a ti-bangbo hle a ni. Gabriel-a chhungte leh club inkar boruak chu a chhe chho hle a, rawlthar lam aṭanga chhuah duhna thu rawn lut hian club hruaitute a ṭhawng takzet a ni.
He rawlthar theihna ngah tak chhuah dilna hian Europe club lian tam tak beng a verh nghal vat a. Real Madrid chuan he Premier League club rawlthar duhawm berte zinga mi hi lakluh an tum ruh hle tih report a ni a, Manchester United hnenah pawh an thiltum hi an tichiang tawh bawk.
Thudawnna hrang hrang tarlan danin, Real Madrid hian JJ Gabriel leh Manchester United ten sum lama an phut (financial requirements) chu pek an inhuam vek a ni. Hemi kawngah hian Real Madrid hi an inrintawk hle a, an hmelma lian FC Barcelona leh Bayern Munich te pawhin he rawlthar hi lo ngaihven ve hle mah se, Madrid lam hian he inelnaah hian hma an hruai ta zawk nia sawi a ni.
Barcelona leh Real Madrid te chu a tir lamah inumzui viau mah se, tun dinhmunah chuan he rawlthar lakluh tumna inelna hian a hun pawimawh tak a chuangkai chho mek a. Spanish club lian Real Madrid hian an elpui lian Barcelona lehkhalha he naupang theihna sang tak hi Bernabeu lama hruai luh ngei an tum ruh hle a ni.
Chutih rualin, Manchester United lam pawh an la tlawm mai duh bik lo. A thlawna an chân mai loh nan leh rawlthar hi Old Trafford-a an la chelh theih beiseiin, United thuneitute chuan JJ Gabriel hnenah hian scholarship contract thar an thehchhuak ve nghal bawk niin report chuan a tarlang.
Real Madrid lam hian Gabriel-a lakluh kawngah hian condition khauh tak an neih hmel a, sum lama a man zat tur pek an inhuam bawk avangin he rawlthar hian Old Trafford chhuahsana Spain ram a pan mai a rinawm chho ta hle a ni.
