Elland Road-a Leeds United nena an inhmachhawn ṭum khan, first half-a Bryan Mbeumo-a'n free header hmanga goal khung theihna hun ṭha a thelh lai khan, directors' box-a ṭhu Manchester United hotute Omar Berrada leh Jason Wilcox te chu an lo chek tlak tlak ngei ang.
Mbeumo-a tauh thelh kha Leeds penalty box chhunga United ball khawih hmasak ber a ni a, hemi hnuah chance ṭha tak dang a hlah zui leh bawk a ni. A tum thumnaah erawh Mbeumo hian goal a khung ta nge nge a, mahse tlarhma lailia goal thun thei tak (clinical centre-forward) nei se chuan United hian chawlhlawk hmain goal hnih faia hma hruai thei an ni. Second half ṭan aṭanga minute nga lekah Leeds lamin an siphurh an rawn sut a, a tawpah point khat ve ve insem tawk zuiin match chu an khar ta a nih kha.
Mbeumo hian hun ṭha vawi hnih a bawhpelh avang hian a chet dan sawisel ngawt theih a ni lo; a zawnin match hnih chhung chu centre-forward lailawkin a khel a, tun dinhmunah chuan he hmunah hian United neih ṭhat ber a ni hrih. Mahse a nihna takah chuan winger a nih miau avangin striker pangngai angin goal hmaah a hlauhawm tawk lo a ni.
Thla liam taa Carabao Cup-a Brighton an hmachhawn ṭuma a chawn ruh na vanga chawl zui ta Benjamin Sesko a inhliam tak avangin, head coach Michael Carrick chuan Mbeumo leh Matheus Cunha te chu tlarhmaah a kawptir a. Sesko hi chhawr theih a nih lai pawhin bul ṭan tura rinrawl a ni bik lo a, Carrick hian striker pangngai awm lova khelh a duh zawk nia ngaihna a awm hman hial a ni. Mahse an match hnuhnung pahnih hian centre-forward rintlak neih a pawimawh zia a pholang chiang hle.
Champions League-ah pawh Atletico Madrid lakah Mbeumo hian chance a hlah nual tawh bawk a, Madrid leh West Yorkshire-a a hun ṭha neih aṭanga goal khat chauh a thun thei kha a beitham deuh a ni. Nipui bazar liam ta khan striker thlakna tur (back-up striker) United-in an la lo kha tihsual lian tak a ni a. Season liam taa match hnuhnung pathum leh pre-season zawng zawng Sesko-a'n a khelh theih loh chhan kha an hrechiang reng si a. United academy chhuak Danny Welbeck kha back-up atana lakluh theih a nih laiin Chelsea-in an la ta daih a nih kha.
Hemi bakah hian tlarhnung veilam (left-back) pawh nipui lai khan United hian an ngaihthah a, an tuar phah mek bawk. Leeds lakah Carrick-a'n khelh dan phung thlakin Diogo Dalot chu left wing-back-ah a chhawr a, Atletico Madrid lakah erawh Ayden Heaven chu left-back-ah a lo khelh tawh bawk. Hliam vangin harsatna an tawk a, mahse Luke Shaw-a'n hliam a tawh leh theih dan leh Sesko-a natna rawn chhuak leh thei dinhmun hi hrilhlawk kher ngai lo thil a ni.
Carrick-a'n hlawhtlinna a chan theih nan United hian nipui khan sum an thehchhuak hnem tawk lo a, January transfer window-ah an tihsual siamṭha tur hian player pakhat emaw pahnih emaw an lak a ngai tawh dawn a ni. Thlasik bazar thlen hunah Carrick hian mawhphurhna a la chelh chhunzawm dawn em tih hriat la ni lo mah se, squad thuamṭhat a ngaihna erawh a danglam dawn lo. Shaw leh Sesko te lo dam fel tawh pawh nise, an squad hi thuamchak belh a ngai reng dawn a ni.
January bazar-ah United hi an ngawi chawi tlangpui ṭhin a, mahse tun ṭumah erawh an tihdan ṭhin hi an thlak a ngai a ni. Transfer window kalta panga zinga pathum (2026, 2024 leh 2022)-ah chuan player thar lakluh an nei lo. January 2025 khan Patrick Dorgu leh Ayden Heaven an la a, January 2021 khan Amad an lo lalut bawk. Thlasik bazar-ah player man a tovin lak tur an vang ṭhin hle tih hriat mah se, left-back leh centre-forward lakluh hian Champions League khelh theihna dinhmun an luah theih nan danglamna lian tak a thlen thei a ni. Wilcox leh Berrada te pawhin squad chak lohna lai an hmu chiang a, January thla hi siamṭhatna hun remchang a ni ang.
