Manchester United head coach Michael Carrick chuan season bul an ṭan ṭhat tawk loh avanga an fan-te rilru a hnual a, an beidawng chu a hriatthiampui thu sawiin, chuti chung erawh chuan tun season atan beidawng mai lo turin United fan-te chu a ngen zui a ni.

Manchester United hian phur tak leh beiseina sang tak nen 2026-27 season hi hmabak mah se, inelna hrang hrangah an match khelh hmasa pasarih (7) zinga pahnih chiah hnehna an la chang a. Chu pawh chu Old Trafford-a an mikhual, Premier League-a kaisang thar Ipswich Town leh Champions League-a vawikhat inlan ve na Sabah lakah chauh a ni.

Premier League-ah pawh khingpui harsa lutuk an tawn loh chungin game nga (5) an khelh aṭangin point 5 chiah an hlawhchhuak a, hmahruaitu Manchester City chu point 10 ngawtin an phak lo nghal der tawh a ni. Hei hian United tan chuan season harsa leh beidawnthlak dang a thlen leh mai dawn em ni tih hlauhthawnna a tizual hle.

Mahse Craven Cottage-ah Matheus Cunha-a'n hun tawp dawn lamah goal khungin Fulham lakah point khat an hlawhchhuah hnu khan, Carrick chuan fan-te chu an thla tihmualpho lo turin a fuih a, hmabak thui tak a la awm thu leh club chhungah tumahin beiseina an la thlahthlam loh thu a sawi lang a ni.

Carrick chuan, "Thudik tak sawi chuan, season lian tak leh thui tak kan la hmabak a ni. Season a thui a, season chhung hian hun ṭha leh ṭha lo te chu a awm kual reng ṭhin. Chu chu season khata zin kawng pakhata mi a ni reng a; hei hi tlan thut (sprint) a ni lo a, tha thawh rei ngai a ni.

"Ka thup buai lo ang a, point tam zawk hmuh kan duh ngei alawm. Chuvangin engkim a ṭha vek e ka ti lo. Fan-te rilru hah leh beidawn dan chu ka hrethiam em em a ni, a chhan chu a aia ṭhaa chet a, thil danglam tih kan duh ve tho vang a ni.

"Mahse rilru hnualna leh inthlahdahna erawh club chhung leh kan squad zingah a awm reng reng lo. Player-te pawhin vawiin khelmual chhungah chutiang nungchang chu an lantir lo a, chu tak chu tun season chhunga min hruai tluan theitu tur chu a ni chiang a ni," tiin a sawi.

Inkhelh ṭan tirha Premier League mawngphaha awm mek Fulham laka point khat chauh an hlawhchhuak chung pawhin, Craven Cottage-a an khelh danah Carrick chuan thil lawmawm hmuh tur a awm niin a hria a ni.

Carrick chuan, "Game kan chak loh avangin kan lungawi lo a, chak tura kal kan ni. Inkhelhah khan chak phu tur khawpin thil tam tak kan tiin ka hria a, chance ṭha tak tak kan siam nual bawk. An goalkeeper kha a save ṭhat em avangin man of the match a ni hial ang. Goal ban vawi hnih lai kan pet per bawk a, kha'ngte avang khan hma hruai zawk awm tak kan ni.

"Second half-ah an rawn che ve deuh a, an goal rawn luh dan pawh kha vanduaithlak taka mahni lama kan inkhung (own goal) vang a ni zui a. Mahse hemi hnu leha kan player-te chet let dan kha a lawmawm hle thung. A hnu deuh tawh chung pawha inkhela kir leh tura kan beih danah khan mipa naupangte hian theihtawp an chhuah ṭha hle a ni.

"Kan ruahmanna leh rilru fim kan vawng reng a, kan thil tum kan theihnghilh lova, a tawpah chuan rahṭha kan chhuah theih phah a, a ṭha zawngin inkhel kan khar thei hram a ni. Phili buai lutuk tur chu a ni lo na a, kan tan chuan pen khat hmasawnna ṭha tak a ni. Point thum hmuh tumin kan kal a, mahse hmalam pan nana innghahna tur eng emaw tal he match aṭang hian kan la chhuak thei a ni," a ti bawk.