Pathiannia Premier League match-a Craven Cottage-a Fulham hmachhawn tur Manchester United squad London pan tura rel chuang tur zingah, striker Benjamin Sesko hmuh a ni ve lova, United tan chanchin duhawm lo a tling thei a ni.

Manchester United head coach Michael Carrick chuan season ṭan tir lamah beisei a phak loh avangin sawisel a tawk chho mek a. United hian an league match hmasa paruk khelh tawhah vawi hnih chauh hnehna an la chang a, kar laia Carabao Cup inkhelah Brighton laka an tlawm bawk nen inelna aṭangin an tla fel der tawh a ni. Chuvang chuan ram aiawha chawlh (international break) a awm hmaa Fulham lakah hian point thum hmuh ngei Carrick-a'n a mamawh takzet a ni.

Inkhelh hma darkar 24 a la awm tihin, Manchester Evening News reporter Steven Railston chuan United squad-in London an pan dan a rawn tarlang a. Railston-a'n social media lama a tarlan danin, rel station-a player lo thleng zingah Slovenian striker Sesko hi a hmuh ve loh thu a sawi a, "Tlaia London pan tur rel station-a squad an rawn thlen lai khan Benjamin Sesko hmel hmuh tur a awm lo. Naktuk match-ah a inlan theih a rual loh hmel hle mai," tiin a ziak.

Sesko hi squad zingah hmuh a ni lo chungin, rel dangah a kal hma emaw a tlai zawk emaw, a nih loh pawhin amahin London a pan ve tawh pawh a ni thei a. Mahse, hliam thar a neih hlauh chuan United tan buaina lian a ni ang, a chhan chu squad chhungah hian striker dang chhawr tur an kawl tawh loh vang a ni. Heti a nih chuan Michael Carrick hian tlarhma laili luah turin Matheus Cunha emaw Bryan Mbeumo emaw a hman a ngai maithei a ni.

Chutih rualin, United tan chanchin lawmawm erawh a awm thung. Defender pahnih Luke Shaw leh Matthijs de Ligt te chu London pan tur squad zingah hian an tel ve a ni. Heng player pahnih te hian khelmual an rah nghal dawn nge, squad tihphur nan an zin chhuak ve mai mai zawk tih erawh chian a la ni lo.

Chu mai bakah, nipui transfer bazar tawp dawna Brighton aṭanga an lakluh midfielder thar Carlos Baleba pawh squad zingah a tel ve nghal a, a kerek hliam aṭanga a damchhuah tawh avangin Fulham lakah hian a vawikhatna atan United jersey a ha ve maithei bawk a ni.

Premier League-ah Fulham hian tun season chhungin hnehna an la chang miah lo bawk a, mahse point mamawh ngawih ngawih United tan chuan mual pawn match khirh tak hmachhawn a ngai dawn a ni.