Thawhṭanni zan khan Nations League match khelh a ni a, Manchester United player pakhat chauh a inlan hman a ni. Europe-a team chak pahnih France leh Belgium te chu an inhmachhawn a, France hian 4-1 in hnehna an chang a ni.
United player dang Senne Lammens leh Youri Tielemans te chu an ram aiawhin inlan fo ṭhin mah se, he match-ah hian chawlh pek an nih avangin an inlan lo thung. Mahse, he zan hi Manchester United defender Leny Yoro tan chuan zan chhinchhiah tlak tak a ni a, France senior team tana a debut match a khelh ṭum a ni.
Kum 20 mi Yoro-a hi Les Bleus tan tlarhnungah a che ropui hle a, defensive contribution vawi 11 lai a nei a ni. Tackle vawi li a neih zinga vawi thum a hlawhtling a, interception vawi khat a nei bawk. Chu mai bakah, ball vawi ruk a clear a, ball vawi li a recover bawk a ni.
Yoro-a hi ground duel (leia innuai) vawi li a neihah a vaiin a hlawhtling vek a, boruakah pawh a chungnung hle. Belgium tlarhma, United striker hlui Romelu Lukaku-a te lakah aerial duel (boruaka innuai) vawi nga a neihah a vaiin a chak vek bawk a ni.
Tlarhnung venhim mai bakah ball a khawih pawhin Yoro-a hi a rintlak hle. He match-ah hian a pass zinga zaa 93 (93%) a thlung dik a, key pass vawi khat a nei bawk. Long ball a vawrh zinga zaa 70 (70%) a dik a, ball vawi 96 lai a khawih hman a ni. Kum 2018 World Cup champion (France) tan hian ball a thunun hneh hle tih a tarlang chiang hle.
Inkhelh zawh hnuah Canal Plus hnenah Yoro-a chuan a chet ṭhat dan chungchangah a lawm zia a sawichhuak a. "Ka beisei phak aia ṭha a ni. Mahni mualah Belgium kan hmachhawn a, ka chhungte pawh an lo kal a ni. Inkhel ropui tak a ni bawk. Goal chhuah miah loh (clean sheet) kha chu kan duh ngei mai, mahse hnehna kan chang a, chuvang chuan sawisel tur a awm lo. A ropui takzet a ni," tiin a sawi.
Yoro-a hian a chet ṭhatna hian Manchester United head coach Michael Carrick-a mit a tlung ngei a beisei a. Tun season-ah hian United starting eleven-ah hmun a chang tlem hle a, he a chet ṭhatna hian hmun pawimawh a chan tam theih nan kawng a hawnsak a beiseiawm hle a ni.
