Argentina chuan ram aiawha an chawlh chhung hian khelh tur match khat chiah an nei tawh a. Benin nen friendly match an khel dawn a, he inkhel hi UK hunah zanlaiah a inṭan ang.

He inkhel hi Lionel Messi-a thlahna match (farewell match) anga sawi a nih avangin, Lisandro Martinez-a'n bul a ṭan a rinawm loh hle a ni. Argentina chanchinbu lar El Debate-in a tarlan danin, manager Lionel Scaloni-a'n Messi-a zahna chawimawina pek nan kum 2022 World Cup-a an starting line-up kha a theihtawpa hnaiha rawn chhawpchhuah leh a tum a ni. He inkhel atana inbuatsaihnaah hian central defence-ah Cristian Romero leh Nicolas Otamendi te chu hman tura ruahman an ni a, Martinez erawh bench-ah a ṭhut hmel thung.

Argentina-in Burkina Faso 7-0 ngawta an sawp ṭum khan Martinez hian first half a khel a, mahse player inthlakthlengna leh chawlh hahdamna hna an thawh avangin lakchhuah a ni. He exhibition game-ah hian Martinez hi Argentina-ah a cham chhunzawm dawn a, bench aṭangin rawn inlan ve bawk mah se, bul a ṭan dawn loh bakah minute 90 pumhlum a khelh a rinawm loh a ni.

Hei hi Manchester United tan chanchin lawmawm tak a ni a, Inrinni zan hian Tottenham Hotspur nen match pawimawh tak an khelh dawn vang a ni. Martinez hian England panin zin kawng thui tak a hmachhawn leh dawn a, training neihna hun a tlem dawn em avangin Argentina-a a hahdam thei tur hi United tan chuan thil lawmawm tak a ni.

United-in nizan lamah pawh an player-te lakah chanchin ṭha an lo dawng tawh bawk a, Belgium match-ah Youri Tielemans (hrem vangin) leh Senne Lammens (chawlh hahdam tir vangin) te an inlan lo ve ve a ni. Kha match-ah khan Leny Yoro-a'n France tan debut ṭha tak a siam a, tunah chuan chakna thar nen Carrington-ah a kir leh thei dawn a ni. Chu mai bakah, Portugal player Bruno Fernandes leh Diogo Dalot te pawhin ram aiawha an match khelh turte an khel zo tawh a, United-ah an kir leh tawh bawk a ni.